Двајца екс градоначалници направиле милионска сума за ручеци по ресторани
Објавено во: Македонија 21 Јуни, 2018
Двајца eкс градоначалници на Општина Старо Нагоричане ја задолжиле општината со милионска сума за ручеци и забави во неколку угостителски објекти.
Полицијата поднесе кривична пријава против М.Ј. (58) и М.С. (58), двајцата од Куманово, поради постоење на сомнение за сторено продолжено кривично дело „несовесно работење во служба“.
Во периодот од 2009 година до ноември 2017 година, пријавените, кои во различни периоди извршувале функција градоначалник на Општина Старо Нагоричане, преку користење на услуги во повеќе угостителски објекти, заради организирање на приватни ручеци и забави, состаноци и прослави со вработени во општината, создавале високи задолжувања на сметка на локалната самоуправа.
Првопријавениот, во периодот од 2010 до 2013 година во два угостителски објекти со свои пријатели направил сметки во вкупен износ од 2.142.538 денари, од кои еден дел платил. Второпријавениот, иако наследил долг од првопријавениот од 1.303.804 денари, продолжил со користење на угостителски услуги и во периодот од 2014 до 2017 година во четири угостителски објекти направил сметки во вкупен износ од 1.245.939 денари, од кои еден дел платил.
Двајцата на тој начин ја задолжиле општината за износ од 1.544.192 денари.