Двајцата гости на „Само вистина“ откажале во последен момент (ВИДЕО)

Добивај вести на Viber

Канал 5 ТВ по овие избори ќе започне медиумска иницијатива за озаконување на задолжителни дуели меѓу канидадатите за централна и локална власт.

Двајцата кандидати за градоначалници на Охрид, Митко Тилевски и Јован Стојановски, синоќа во последен момент го откажале гостувањето во емисијата „Само вистина“ на телевизијата Канал 5.

„Вечерва и ние, Канал 5 ТВ, но и вие, македонската јавност конечно се соочивме со вистината – политичкиот примитивизам. Вечерва требаше да гостуваат двајцата кандидати за градоначалници на Охрид Митко Тилевски и Јован Стојановски, кои требаше пред вас, а не пред нас да ги претстават своите идеи, замисли и проекти како тие би управувале со општината Охрид во наредните 4 години“ - рече водителката Мирјана Трпчевска. 

Според телевизијата, очигледно некои од нив, но и претходно неоправдано отсутните кандидати, не се навикнати на прашања – прашања ваши, прашања на јавноста и повторно забораваат. 

„Сите тие ќе управуваат со општините со наши и ваши пари. Затоа имаат обврска да ви се претстават вам, за да знаете кому ќе го дадете вашиот глас. Очигледно сакаат да дојдат на нарачани прашања и теми, поради фактот што некои тоа им го овозможуваат, но тоа за наша и ваша среќа не е можно во Канал 5 ТВ. Легитимно е да се прашаме, ако бегаат, кукавички сега, кога се борат за фотељата, какви ли ќе бидат кога ќе станат татковци на општините? Затоа, особено охриѓани, размислете кому го давате вашиот глас. Дали на политички кукавици, или на чесни и достоинствени претставници на вашите семејства“ - кажа водителката  Трпческа.

Таа најави дека Канал 5 ТВ после овие избори ќе започне медиумска иницијатива за озаконување на задолжителни дуели меѓу канидадатите за централна и локална власт. 

Имаме право на тоа, поради вас јавноста, но и поради нашите пари, порача Телевизијата.