ДВЕ КУЌИ, ТРИ СТАНА, АКЦИИ: Колкаво богатство пријавил директорот на Фондот за иновации?
Објавено во: Финансии 25 Јули, 2018
Јован Деспотовски е актуелен директор на институцијата која изминативе денови беше во центар на вниманието на јавноста околу распределбата на грантовите со повикот на Фондот за иновации и технолошки развој.
На директорската функција Деспотовски дојде минатата година заменувајќи ја Јасмина Поповска.
Деспотовски е дипломиран економист, долгогодишен член на раководството на СДСМ и еден од најблиските соработници на Радмила Шеќеринска со која работеше во Секретаријатот за европски прашања.
Каков имот пријавил во анкетниот лист
Две куќи, три стана, акции се само дел од анкетниот лист објавен на страната на Државната комисија за спречување корупција.
Една куќа во Скопје, и една во Крушево лично поседува директорот на Фондот, додека трите станови, секој посебно во вредност од над милион денари се во главниот град.
Деспотовски вози Голф 5 вреден 300 илјади денари.
Според анкетниот лист, Деспотовски на негово лично име поседува акции во вкупна вредност од 375 000 денари, деловен простор во Скопје во вредност од 450 000 денари и згради во останато стопанство во вредност од 700 000 денари.
На имот на брачен другар, директорот на фондот има пријавено двор, згради во останато стопанство, земјоделско земјиште, девизен и денарски депозит во банка и лизинг.
На име на децата Деспотовски пријавил денарски и девизни депозити, а на негово лично име има и заеми, кредит и лизинг.