Џафери кажа фала за поддршката од Бугарија за НАТО, Борисов задоволен
Објавено во: Македонија 20 Февруари, 2019
Мир, стабилност, просперитет. Овие акценти ги стави во изјавата претседателот на Собранието на Северна Македонија, Талат Џафери по ратификацијата на страна на бугарскиот парламент на Протоколот за пристапување на Северна Македонија во НАТО.
Џафери присуствуваше на дебатата на бугарските законотвроци и се заблагодари за безрезервна поддршка, која ја доби за евроатлантската иднина на Северна Македонија.
Според него потпишаниот договор за пријателство и добрососедство со Бугарија веќе дава резултат.
„Успеавме да потпишеме и договор со Грција, кој реши еден повеќегодишен спор. Сепак победи разумот, победи визијата“, рече тој.
„Од толку години чекање за пристапување во НАТО, НАТО за нас стана реалност со ратификацијата на протоколот од сите земји-членки“, рече уште Џафери.
Директорката на НС Бојата Карајанчева посочи дека Бугарија е подготвена да продолжи да ги решава проблемите на регионот и да се грижи за безбедноста.
„Бугарија и Северна Македонија можат да се гордеат со договорот за пријателство и соработка, кој го потпишаа - така покажавме дека ги бараме допирните точки и точките на согласност и така можеме да бидеме посилни“, рече таа.
Според неа европската политика на Западен Балкан за време на нивното претседателство со Советот на ЕУ се покажа корисен потег не само за Бугарија, но и за Балканот.
„Балканот долго време беа синоним за конфронтација, но примерот кој ние го дадовме, ја потврди категорично нашата заедничка решеност да работиме за мир, стабилност и суверенитет. Ја поздравувам Северна Македонија и за потпишување на Преспанскиот договор - тоа ја покажува неотповикливоста на евроатлантските процеси кои се развиваат во регионот. Така покажавме дека заедно можеме да наоѓаме решенија за приоритетите кои Бугарија ги има зацртано во своето европредседателство“, рече уште Карајанчева.
Му благодариме на парламентот и на пратениците за ратификување на Договорот за пристапување на Северна Македонија кон НАТО, рече премиерот Бојко Борисов на редовната владина средба.
„Го ратификувавме договорот за Северна Македонија, направивме многу напори, му благодариме на парламентот и на пратениците за оваа мудра одлука“, рече Борисов.
Фото: Димитар Косемарлиев, Dnes.bg