Еден од најискусните македонски бизнисмени ќе застапува странски компании
Објавено во: Економија 18 Јануари, 2022
Еден од најпознатите бизнисмени во Македонија, Кочо Моцан, започнува нова дејност во Македонија со која ќе посредува и ќе застапува странски компании-потенцијални инвеститори во земјата.
Бизнисменот кој го одбележа работењето на Технометал Вардар, како и еден од најголемите акционери на „Макошпед“, ја менува долгогодишната адресата на живеење од Франкфурт во Скопје со основање на „КММВ Инт“.
- Јас сум условно во пензија, но и натаму сум деловно активен. Постојат заинтересирани компании од Германија, Австрија и Италија на кои им се потребни информации за македонскиот пазар. Јас сакав сето тоа да се одвива преку официјални канали и затоа го основав ова друштво, ни изјави Моцан.
Тој вели дека поголемиот дел од изминатите 30 години ги минал во Германија и дека во Македонија ќе работи со дозвола за престој.
- Јас сум германски државјанин, а познато е дека Германија не дозволува дуално државјанство ако доаѓате од земја што не е во Европската Унија. Затоа беше потребно прво да обезбедам дозвола за престој. Сепак поголем дел од времето планирам да го поминувам во Скопје и Крушево, а помалку во Германија. Значи не може да се каже дека јас се враќам во Македонија, вели Моцан.
Во сопственост на семејството Моцан е винаријата „Мовино“ од Росоман, а крушевскиот бизнисмен долги години беше еден од најголемите продавачи на македонското вино во Германија. Вели дека германскиот пазар за македонското вино е стабилен, но дека има ситуации кога се соочува со нелојална конкуренција.
- Во Германија се продава 20 милиони литри македонско вино, главно по наливен програм. Но, сепак потребно е поголемо единство за да не ни ги рушат позициите таму, тврди искусниот бизнисмен.
Моцан во јавноста е познат како акционер на „Макошпед“, а беше и на чело на фирмата-ќерка на „Технометал Вардар“ во Франкфурт, „Технометал-ГМБХ“ со четири децении присуство на германскиот пазар.
Моцан во 2014 го продаде крушевскиот производител на текстил „Голд текст" кој во тој момент имаше 60-тина вработени и готови производи наменети за извоз во Западна Европа.
А.К.