Едштадлер: Австрија се нуди да посредува во спорот помеѓу Македонија и Бугарија
Објавено во: Македонија 04 Мај, 2021
Австриската министерка за Европа и Устав, Каролине Едштадлер, при денешната посета на Скопје, на заедничката прес-конференција со вицепремиерот за евроинтеграции Никола Димитров рече дека Австрија дава понуда да биде посредник во надминувањето на спорот помеѓу Македонија и Бугарија за откочување на европерспективата на нашата земја.
- Сакам да ја истакнам понудата на Австрија да посредуваме во решавањето на спорот. Сега се работи за ништо помалку од нашата заедничка иднина. Сега кога се ближи 9 Мај - Денот на Европа, да ги вградиме земјите од Западен Балкан во дијалогот. Интеграцијата да се забрза и да се даде перспектива . Затоа Австрија сака како партнер на земјите од Западен Балкан да ја игра оваа улога, знаејќи дека на европско ниво треба уште некои работи да се дозавршат за дијалогот да продолжи, истакна Едштадлер.
Димитров рече дека неговите ветувања се потпираат на ветувањата на Брисел и дека не треба идните избори да бидат пречка во надминувањето на блокадата на Бугарија.
- Овде ќе има локални избори, во Бугарија во ноември ќе има претседателски избори. Мислам дека немаме право однапред да креваме раце. Многу земји членки на ЕУ чусвтвуваат и разбираат дека е крајно време оваа година да има сериозно поместување кон подобро за европската идеја во нашиот регион. Многу е тешко тоа да биде убедливо ако македонскиот случај не биде препознаен и потврден преку меѓувладина конференција. На регионот му треба успех оваа година, рече вицепремиерот.
Едштадлер дополни дека Македонија нема да остане зад Албанија кога станува збор за добивањето на датум за добивање на преговори. Таа дополни дека Македонија спречила вкупно 52.000 илегални емигранти да преминат без дозвола во ЕУ и потсети дека Скопје ќе добие вкупно 120.00 Фајзер и Бајонтек вакцини како донација од Брисел.