Екологистите бараат навремена акција за загадувањето, во зима ќе биде алармантно
Објавено во: Македонија 10 Јули, 2019
Во Европа само БиХ е позагадена земја од Македонија.
Нашата земја е втора, БиХ е прва, Косово е трето, Бугарија е четврта, а Србија е петта. Од балканските земји Хрватска е на 7 место, а Романија на 9 место.
Анализата што ја спроведоа швајцарската организација „Ај-кју ер“, која собира податоци за квалитетот на воздухот ширум светот, и меѓународната организација „Гринпис“, покажува дека Македонија била втора земја во Европа, според просечната загаденост на воздухот во 2018 година.
Овие податоци укажуваат на екстремна загаденост на Балканот. Ако погледнеме по градови најзагадени се босанските градови, Лукавац, Живинице и Грачаница, а зад нив е Тетово. На 6 место е Сараево, а зад него е Куманово. На 8 место е Битола, а 10 е Тузла, додека Скопје е 12-то. На 14-то место се најде Приштина.
Ако погледнеме статистика во светски рамки, тогаш БиХ е 14-та, а Македонија 15-та најзагадена земја по светот, а зад нив се редат и другите држави од регионот.
Екологистите сметаат дека вина има кај граѓаните и институциите за ваквата состојба.
„Свеста на луѓето е на многу ниско ниво, но и институциите треба да го сфатат проблемот сериозно. Мора да има повеќе инспектори на терен. Да има повеќе корпи за смет по градовите. Сите знаеме дека во Франција и Германија луѓето имаат дисциплина поради казните, да не се лажеме. Јас сметам дека и Штип е загаден град како Тетово и Скопје. Мораме да имаме плански депонии во регионите во државата. Кога ќе ги имаме нив и кога ќе бидеме на ниво да се селектира оптадот, тогаш ќе имаме ефекти. Се палат гуми, смет, тоа чади и секако дека го загадува и воздухот. Во Холандија имаат многу добра пракса, тие автомобилските гуми не ги палат, туку ги сецкаат и ги искористуваат, и ние секогаш кога сме повикани некаде, тоа го кажуваме како пример“, вели Јорданка Калајџиеска, од еколошкото друштво Виножито од Штип.
Нестор Јаулески, еколог и професор по билогија од Струга вели дека во секој регион има еколошки проблеми, но треба да се утврдат приоритетите.
„Ние немаме одржлив и функционален систем за управување со отпад, и срамота е во 21 век тоа да го немаме, а да се занимаваме со милион други неважни работи“, вели тој.
Според него најалармантно е во Скопје и Тетово и таму мора да се направи нешто.
Сања Атанасовска