ЕКОНОМСКИОТ РАСТ ГИ СКАРА ПАРТИИТЕ: За ВМРО-ДПМНЕ тоа е дно, за СДСМ ова е последица на претходното владеење
Објавено во: Економија 09 Март, 2018
Oд ВМРО-ДПМНЕ велат дека македонската економија е на дното во Европа поради катастрофалните економски политики кои ги води Владата на СДСМ.
Тие сметаат дека Владата на СДСМ е фокусирана на деструкција, уривање споменици, притворање на неистомисленици, а економијата не е ниту во втор план, туку е крајно маргинализирана, според нив.
Од партијата истакнуваат дека во услови кога цела Европа забележува високи стапки на раст на БДП, македонската економија стагнира.
„Пад бележат дејностите: информации и комуникации, финансиски услуги, јавна управа и одбрана, активности во врска со недвижниот имот, освен дејностите трговија и земјоделство. Наместо Владата да промовира мерки со кои директно ќе ја помогне економијата, со површни мерки и гол популизам, купува време за опстојување на власт. Популизмот на Заев се сруши пред фактите и бројките, објавени од Државниот завод за статистика. Неспособноста да испорача економски раст, Владата ја покрива преку пресметка со политичките неистомисленици“ - велат од ВМРО-ДПМНЕ.
Порастот на Бруто домашниот производ (БДП) од 1,2 отсто во последното тромесечје од 2017 година ја потврдува исправноста на економските политики на Владата предводена од СДСМ и е уште еден во низата показатели дека економијата се стабилизира и се движи во добар правец, порачуваат од СДСМ.
Владејaчката партија вели дека негативните економски показатели се резултат на владеењето на ВМРО-ДПМНЕ.
„Последните три месеци од криминалното и расипничко владеење на ВМРО-ДПМНЕ и нивните погубни политики донесоа пад на економијата од 1,3 отсто во првиот квартал од 2017 година. Дополнително, преку политиките на деструкција, блокади и насилство кое кулминираше на крвавиот четврток, ВМРО-ДПМНЕ предизвика економска и правна несигурност за граѓаните и стопанството а сето тоа поразително се одрази врз економијата“- обвинуваат од СДСМ.
Стапката на раст на бруто-домашниот производ (БДП) во четвртото тримесечје од 2017 година е 1.2%, покажаа податоците на Државниот завод за статистика објавени вчера.