Екс министерот Тевдовски ќе го засили Надзорниот одбор на УНИ банка
Објавено во: Финансии 26 Ноември, 2019
Поранешниот министер за финансии Драган Тевдовски е предложен за нов независен член на Надзорниот одбор на Универзална Инвестициона Банка АД. Тевдовски ќе биде избран на Собранието на банката чија седница е закажана за 30 декември годинава.
УНИ банка ја објави предлог одлуката на Македонска берза. Тевдовски ќе има мандат во Надзорниот одбор од четири години, со претходна согласност од Народна Банка.
„Именуваниот член на Надзорен одбор има права и обврски согласно Законот за банки, Статутот и другите акти на Банката. Се овластува Управниот одбор на Банката да ги превземе сите потребни правни дејствија во Народна Банка на РСМ и Централниот регистар на РСМ, како и по потреба да врши дополнување и измена на оваа одлука, стои во предлог одлуката.
Тевдовски беше министер за фианансии во Владата на Зоран Заев се до таканаречената „метла“ кога мораше да замине од функцијата. На негово местокако вршител на должноста Заев се именува самиот, но подоцна ја избра актуелната министерка Нина Ангеловска да го замени во еден од најважните ресори. Под палка на Тевдовски беше воведен прогресивниот данок на личен доход, кој сега се става под мирување.