Екс шефица на кабинет на ДЗС доби кривична пријава
Објавено во: Македонија 24 Март, 2018
Поранешна шефица на кабинет во Дирекцијата за заштита и спасување заработи кривична пријава по сомнежи дека ја злоупотребила функцијата.
Надворешната канцеларија за криминалистички работи Гевгелија, до Основното јавно обвинителство Гевгелија, поднесе кривична пријава против М.Х од Скопје која се сомничи дека ги злоупотребила службената положба и овластување.
„Пријавената во 2008, 2013, 2014 и 2015 година во својство на службено лице – Шеф на кабинетот во Дирекцијата за заштита и спасување – Скопје, спротивно на членовите 45, 46 и 47 од Законот за пожарникарство, изготвила и издала „Овластување за одржување , сервисирање и испитување на противпожарни апарати“ и „Овластување за одржување и сервисирање на стабилни инсталации за откривање, јавување и гаснење на пожари и откривање на експлозивни смеси“ на правни лица од Гевгелија и Валандово“, соопшти МВР.
Таа исто така, издала и Потврди за положен стручен истит на повеќе физички лица, кои за возврат и давале паричен надомест, од кои дел бил уплатен на нејзина сметка, а дел и бил даден на рака.
„На тој начин М.Х. се стекнала со материјална корист, а на штета на Дирекцијата за заштита и спасување Скопје“, соопшти МВР.