Експертските комисии од денеска со нов циклус на средби за Гоце Делчев

Мешовитиот комитет по историја составен од македонската и бугарската експертска комисија денеска во Софија се состанува на првата од последните три средби пред да се изнајде конечно решение за потеклото на националниот херој Гоце Делчев. Средбите за утврдување на препораки до владите и соодветните министерства на двете држави за подобрување на учебниците по историја за шесто одделение според бугарскиот образовен систем и седмо одделение според македонскиот образовен систем, кои што ги опфаќаат средновековниот период од историјата и евентуално заедничко чествување на Гоце Делчев се двете теми за кои ќе се расправа и утре.

Средбата е продолжение на претходната, која се одржа во Скопје во јуни, а во меѓувреме бугарскиот премиер Бојко Борисов и шефот на македонската Влада, Зоран Заев, ги повикаа комисите да не потпаѓаат на политички влијанија и да дојдат до меѓусебен договор пред добивањето на очекуваниот Датум за преговори од ЕУ во октомври.

Истовремено имаше и несогласување помеѓу предводниците на комисите - Драган Ѓорѓиев од македонска и Ангел Димитров од бугарската страна. Димитров предложи средбите да се интензивираат додека не се најде решение, додека Ѓорѓиев порача дека тие ќе останат да се одвиваат по истата агенда. Инаку Гоце Делчев беше тешкото прашање на последната средба во јуни, а тогаш македонскиот и бугарскиот претседавач напоменаа дека за одредени работи експертите од двете земји постигнале согласност во однос на личноста и делото на Делчев, но за одредени, нивните мислења се спротивставувале.

Досега, заедничката комисија има одржано шест средби и препорачано на владите на двете држави заеднички чествувања на Св.Кирил и Методиј, Св.Климент, Св.Наум и Цар Самоил, како и препораки за подобрување на учебниците по историја за шесто одделение во Република Северна Македонија и петти клас во Република Бугарија кои се однесуваат на античкиот период од минатото.