ЕМА денеска ќе се изјасни за вакцината на Џонсон и Џонсон: Во САД по примање на Јансен почина млада жена, таму вакцината е суспендирана

Добивај вести на Viber

Европската агенција за лекови (ЕМА) денеска попладне ќе го каже своето мислење за вакцината на Џонсон и Џонсон чија употреба е суспендирана во САД и Европа поради ретка појава на згрутчување на крвта.

ЕМА со седиште во Амстердам во петокот објави дека ќе одржи „виртуелна прес-конференција за заклучоците од проценката на безбедноста“ на вакцината на 20 април во 16 часот по средноевропско време.

Оваа одлука е важна затоа што неколку европски земји, вклучително и Франција, сметаат на вакцината за да ја забрзаат кампањата за вакцинација.

Неизвесноста се појави откако американските здравствени власти препорачаа „пауза“ во употребата на вакцината Јансен од производителот Џонсон и Џонсон пред една недела за да се испита појавата на сериозни случаи на згрутчување на крвта кај неколку лица во Соединетите држави.

Едно лице почина во САД неколку дена по аплицирање на вакцината, додека шест лица во САД развиле ретко нарушување, кое вклучува згрутчување на крвта. Сите шест вакцинирани со несакани ефекти биле жени на возраст од 18 до 48 години, а симптомите се појавиле шест до 13 дена по вакцинирањето.