Емил Угриновски влегува во градежниот бизнис

Добивај вести на Viber

Бизнисменот Емил Угриновски станува инвеститор во градежниот сектор со новоотворената компанија Форб Инвестмент, заедно со својот син Кристијан Угриновски, кој е управител на претпријатието чија дејност е изградба на станбени и нестанбени згради.

Сопственикот и генерален директор на Неуромедика досега беше познат исклучиво по бизнисот во здравството, а за „Фактор“ вели дека веќе има неколку проекти на лагер со кои ќе се испроба во новата дејност.

- Да, точно е дека влегуваме во градежниот бизнис, кој ќе го води мојот син Кристијан, како млад успешен менаџер, кој успешно го одработи својот старт-ап бизнис со Gyro house, со кој докажа дека и младите луѓе во оваа држава имаат знаење и можат уште како многу млади да имаат одличен успех. Проектот со градежниот бизнис ќе го води тој, а планирани се проекти за изградба на станбени и деловни единици, ни изјави докторот.

Неговата болница, која има и повеќе експозитури низ земјата и во Грција, минатата година ја прослави 30-годишнината од своето постоење. Здравствената установа се занимава претежно со дијагностика и превентива и е меѓу оние со најголеми приходи. Во 2017 беше отворена новата болница со вредност од вложени осум милиони евра.

Инаку, становите во Македонија не престануваат да поскапуваат и градежниот бизнис останува примамлив и за оние кои никогаш претходно не се занимавале со него, а особено примамливо е колективното домување како сектор. Според податокот на Народна банка за последниот квартал од минатата година, годишната стапка на раст кај цената на становите изнесува 20,6 отсто.

Всушност, минатата година беше година на убедливо најголеми поскапувања на станбениот квадрат, започнувајќи со годишна стапка на раст од 12,4 отсто во првиот квартал, по што следуваше второто тримесеје со стапка на пораст од 16,5 проценти. Следуваше третиот квартал со своевидна драма на пазарот на недвижности, поскапувајќи ги становите на годишно ниво за 21,2 отсто, и четвртиот, со минорно пониска, но сепак многу висока стапка на раст на цената од 20,6 проценти.

А.К.