Ердоган не сака поделби, но еве го и ставот за смртната казна...
Објавено во: Балкан 16 Јули, 2017
Турскиот претседател Реџеп Таип Ердоган вчера на одбележување на една година од неуспешниот обид за пуч се осврна и на смртната казна.
„Многу непријатели ја очекуваат пропаста на Турција, а ако почнам да ги набројувам, тоа ќе доведе до многу голема криза на меѓународно ниво“- изјави Ердоган за време на големиот митинг кој се одржа во Анкара по повод годишнината од обидот за воен удар.
Тој порача дека никој нема да го подели турскиот народ.
„Нема да ги исклучите нашите молитви. Нема да успеете да ја поставите нашата земја на колена. Нема да успеете да го оковате нашиот народ“- вели Ердоган.
Вети и дека ако во парламентот биде поднесено барање за враќање на смртната казна и ако таа биде одобрена, тој ќе го потпише указот за нејзина реализација. Ердоган напомена и дека минатогодишниот обид за државен удар нема да биде последен и побара од жителите на Турција да бидат подготвени доколку се случи такво нешто.
Премиерот Бинали Јилдирим порача дека борбата против организацијата на Фетулах Ѓулен ќе продолжи и понатаму.
„Борбата ќе продолжи, додека не остане ниту еден член на Фето“- изјави Јилдирим.
Митингот започна со пеење на националната химна и едноминутен молк во спомен на 249 – те загинати во неуспешниот обид за државен удар.