Ердоган нема да чека долго, на 24 јули во Аја Софија почнуваат молитвите
Објавено во: Свет 11 Јули, 2020
Турскиот претседател Реџеп Таип Ердоган објави дека првата молитва во Аја Софија ќе се одржи во петок, 24 јули.
Обраќајќи се пред народот, Ердоган рече дека, како и во сите џамии во земјата, „вратите на Аја Софија ќе бидат отворени за сите и дека билетите веќе нема да се наплаќаат како што се случуваше кога таа беше музеј“.
Тој ја нарече Аја Софија „бисер на Истанбул“ и ги советува граѓаните да не го посетуваат пред вратите да бидат официјално отворени.
„Планираме да ја отвориме Аја Софија како џамија со молитва на 24 јули. Како и сите наши џамии, портите на Аја Софија ќе бидат отворени за сите, нашите граѓани и странци, муслимани и немуслимани“, рече Ердоган.
Ердоган рече дека тие ги отстраниле објектите пред Аја Софија, каде седеле чуварите и вработените кои собирале билети.
Според турскиот весник „Хуријет“, во храмот ќе бидат поставени специјални средства - завеси што ќе ги покриваат иконите за време на молитвата, додека теписите ќе бидат поставени на подот. По влегувањето во храмот, посетителите ќе треба да ги соблечат чевлите.
На 10 јули турскиот претседател Реџеп Таип Ердоган потпиша декрет да ја претвори Аја Софија во џамија. Оваа уредба ја отповика одлуката на турските власти од 1934 година овој храм да се претвори во музеј.