ЕСМ: Субвенциите за инвертери се владин проект

Добивај вести на Viber

Субвенционирањето инвертери за греење како замена за греењето на дрва е мерка на Владата, која уште на 24 август 2019 година ја објави премиерот Зоран Заев при посетата на Битола. Се работи за владина мерка која почива на претходно направени стручни анализи и пресметки за придобивките од истата во однос на намалено загадување на воздухот и намалени трошоци за греење на граѓаните, стои во реакцијата на Електрани на Северна Македонија на текстот на Фактор.  

„Вклученоста на АД ЕСМ во овој проект произлегува од  обврската за општествена одговорност како профитабилна компанија да се отстапи дел од остварениот приход за проекти кои се во интерес на граѓаните и на околината. АД Електрани на Северна Македонија ќе го поддржи секој проект кој е енергетски, како наведениот, за разлика од непродуктивните проекти од несуштинска дејност за компанијата, како што се правеше во минатото. АД ЕСМ во моментот очекува владина одлука со конкретно задолжение во однос на обврските на компанијата во спроведувањето на мерката, стои во реакцијата. 

Од ЕСМ велат дека во однос на споредбата за степенот на загадување, секој добро упатен во енергетиката и животната средина може да разбере дека загадувањето од производството на количината електрична енергија која одреден број семејства ќе ја користат за греење преку инвертери е за десетици и повеќе пати помало од загадувањето кое би се случило доколку тие семејства се греат на дрва.

„Исто така, потсетуваме дека АД ЕСМ вложува во обновливи извори на енергија, фотонапонски и  ветерни електрани, меѓутоа тоа се инвестиции за зголемување на производството на компанијата, а не се директни мерки за граѓаните и за таргетирано решавање одредени проблеми со загадувањето на воздухот, како што е мерката субвенционирање инвертери за греење, пишува ЕСМ.