ЕУ НЕ САКА СОСТАНОК СО ПУТИН: Меркел потврди, а што е причината?
Објавено во: Свет 25 Јуни, 2021
Германската канцеларка Ангела Меркел потврди дека лидерите на Европската унија не постигнале договор за самитот со Русија предложен вчера од Берлин и Париз.
Балтичките земји ја истакнаа потребата од повнимателен пристап кон ова прашање.
„Тоа беше многу сеопфатна и не многу лесна дискусија“, истакна германскиот канцелар пред новинарите по првиот ден од разговорите во Брисел, пренесува Ројтерс.
Меркел рече дека лидерите на ЕУ ги редефинираат условите под кои тие се подготвени да соработуваат и тесно да комуницираат со Русија, но дека нема договор за самитот.
Европската унија е длабоко поделена во пристапот кон Москва, а членките кои се граничат со Русија го отфрлија француско-германскиот план за продолжување на официјалните средби со рускиот претседател Владимир Путин, пренесува АП.
Во изјавата во раните утрински часови денес, лидерите на ЕУ рекоа само дека „ќе ги испитаат форматите и условите за дијалог со Русија“, а не беа објавени средби на високо ниво или планови за самит со рускиот претседател Владимир Путин.
Балтичките земји нагласуваат дека е потребно нормализирање на односите меѓу ЕУ и Русија, но дека на ова прашање мора да се пристапи со претпазливост.
"Мора да бидеме претпазливи за вистинските намери на режимот на Путин. Засега не гледаме никаква радикална промена во однесувањето на Русија", им рече литванскиот претседател Гитанас Науседа на новинарите на самитот на ЕУ во Брисел.
Другите балтички држави, Естонија и Летонија, исто така се длабоко загрижени за контактите со Москва во време кога не се почитуваат договорите од Минск насочени кон мир во Украина, бидејќи Русија сè уште е во конфликт со сепаратистите поддржани од Русија.
Претседателот на Естонија, Каја Калас, рече дека податоците на разузнавачките служби потврдуваат дека санкциите против Москва функционираат и дека Европската унија мора да покаже трпеливост.
Претседателот на Франција, Емануел Макрон, вчера во Брисел оцени дека дијалогот на ЕУ со Русија е неопходен за стабилноста на европскиот континент, но исто така посочи дека ЕУ не се откажува од своите вредности и интереси во дијалогот со Москва.
Франција и Германија предложија самит на ЕУ и рускиот претседател Владимир Путин, а Москва вчера изјави дека ги поддржува сите иницијативи што можат да го поттикнат дијалогот меѓу Брисел и Русија.
Русија е најголем снабдувач на природен гас во ЕУ и игра клучна улога во голем број меѓународни конфликти и прашања поврзани со европските стратешки интереси, вклучително и иранскиот нуклеарен договор и конфликтите во Сирија и Либија.