ЕУ се заканува со такси за струја кон Македонија и другите од Западен Балкан
Објавено во: Економија 11 Февруари, 2019
Во последниве неколку дена, регионалните медиуми информираат дека Европската унија може за Западен Балкан да воведе такси за производителите на електрична енергија поради емисиите на јаглерод диоксид. Тоа би претставувало шок за цената на електричната енергија, ако се знае дека кај шесторката Македонија, Србија, БИХ, Црна Гора, Албанија и Косово струјата главно доаѓа од термоелектрани што работат на јаглен.
Шефот на секторот за електрична енергија на Секретаријатот на Енергетската заедница на Југоисточна Европа, Јасмина Трхуљ, рече дека се уште не постои временски рок за ова прашање.
Таа рече дека студијата за субвенции во секторот за јаглен е во тек и дека ЕЕЗ сака да започне разговори за оваа тема, изјави за Ал Џезира.
Ова прашање постојано е на дневен ред на Советот на министри на Енергетската заедница и тие засега велат "не" на европската шема за тргување со емисии.
Ваквите закани треба да ја охрабрат транзицијата од фосилни горива на обновливи извори на енергија, но и да се награди истото со субвенции.
Стимулансите би се однесувале на гасни и хидро централи, како и на ветерници и на соларни платформи.