ЕВН Македонија: Ненадејно почина нашиот драг колега Атанас Ковачевски
Објавено во: Мои пари 19 Јуни, 2020
– Со огромно жалење информираме дека ненадејно почина нашиот драг колега Атанас Ковачевски. Ковачевски беше дел од компанијата од 2009 година и даде огромен придонес во Одделот за комуникации, обликувајќи ги и пренесувајќи ги информациите од компанијата на едноставен и разбирлив начин. Портпаролската позиција во компанијата ја водеше со огромна посветеност и темелност.
Ковачевски учествуваше во низа проекти чија цел беше приближување на активностите на компанијата до јавноста, подигнување на транспарентноста и едукација на јавноста на целокупниот енергетски сектор.
Пред да стане дел од тимот за комуникации на ЕВН, Атанас Ковачевски беше долгогодишен спикер и новинар во јавниот сервис МТВ и во Канал 5, а беше познат и како радио водител. И во текот на својата новинарска и водителска кариера остави свој, специфичен печат на секогаш ведар, а истовремено високо одговорен професионалец.
Прераното заминување на Ковачевски е огромна загуба за компанијата, а особено за неговото семејство. Нашиот Атанас ќе ни остане во паметењето како омилен колега, човек со голем дух и огромна професионална посветеност.
ЕВН Македонија