„ЕВРОПА МОРА ДА ИМА СВОЈ ВОЕН БЛОК“: Зеленски удри по Трамп, бесен поради преговорите за ставање крај на војната во Украина

Добивај вести на Viber

Украинскиот претседател ја повика Европа да формира свои безбедносни сили. Тој е незадоволен од односот на Доналд Трамп кон Европа и Украина пред почетокот на преговорите за ставање крај на војната во Украина.

Минхенската безбедносна конференција се одржува во Минхен, Германија (14-16 февруари), каде што украинскиот претседател Володимир Зеленски денеска апелираше до членките на Европската унија и европските членки на НАТО да формираат свој воен блок за да се заштитат од Руската Федерација во иднина, јавува Асошиетед прес. Изјавата на украинскиот лидер доаѓа откако германскиот канцелар во заминување Олаф Шолц изјави дека американскиот потпретседател Џеј Ди Венс се сретнал со лидерот на АФД, германската крајнодесничарска партија, пред парламентарните избори во Германија на крајот на февруари.

На овој безбедносен самит, американскиот претседател Доналд Трамп требаше да го претстави планот за ставање крај на војната во Украина. Но, претставувањето на планот беше одложено поради, како што тогаш се наведува, вклученоста на Европската унија и НАТО во мировните преговори.

„Навистина верувам дека дојде моментот. Вооружените сили на Европа мора да се формираат“, рече Зеленски.

Не се знае дали европските лидери ќе ја „фатат“ изјавата на Зеленски. Доналд Трамп разговараше со рускиот претседател Владимир Путин и со украинскиот претседател Володимир Зеленски во средата, 12 февруари. По враќањето на Доналд Трамп на власт, меѓу САД и Европската унија има несогласување во однос на пристапот кон преговорите за ставање крај на војната во Украина, што секако му одговара на Владимир Путин.

Украинскиот претседател инсистира Украина да биде на преговарачка маса и конкретно наведува дека мора да биде присутна и Европската унија. Зеленски го критикува Трамп што не ја споменува Европа во неговите планови за мировни преговори.

„Украина никогаш нема да прифати зделки направени зад наш грб, истото правило треба да важи и за Европа. Пред неколку дена претседателот Трамп ме информираше за неговиот разговор со Владимир Путин. Ниту еднаш не спомна дека на Америка и треба Европа на преговарачка маса. Тоа доволно зборува. Старите времиња кога Америка ја поддржуваше Европа завршија“, нагласи украинскиот претседател.