Фајненшл Тајмс: Руските дипломати поткупувале за влијание на екстремни протести против договорот за името
Објавено во: Балкан 14 Јули, 2018
Oбид за поткуп на десничарски организации и црковни претставници во Грција за да протестираат против договорот за името е една од причините што официјална Атина протера руски дипломати, објави весникот „Фајненшл Тајмс“. Според она што го пренесуваат грчките медиуми, извор на информациите е неименуван висок грчки дипломат а настанот на кој се реферира се случил во градот Александропулос.
Во текстот на Фајненшл Тајмс се вели дека руските дипломати поттикнувале руски бизнисмени во градот да им плаќаат на локални припадници на црквата, културни организации и десничарски групи а со цел да го зголемат отпорот кон договорот за името. Случајот излегол на виделина кога грчки војник пријавил кај својот претпоставен.
Одлуката на Атина да протера руски дипломати и денеска се коментира во грчките медиуми, во најмала рака како особено чувствителен настан. Во новинарските текстови се потсетува дека Атина не протерувале дипломати од Русија и останатите земји од источниот блок ниту во времето на Студената војна, а Атина вообичаено има добри односи со Кремљ.
Додека грчката влада само општо соопшти дека причината за протерување е и договорот со Македонија, русите се на позиција дека целиот случај нема основа во реалноста и дека Атина работи по диктатот на Вашингтон. А токму министерот за одбрана на САД, Џејмс Матис, од Загреб реплицираше дека русите се обидуваат да го дестабилизираат овој дел од Европа.