ФАКТОР НА ТЕРЕН: Еве кој ја почитува владината одлука за намалување на цените

Добивај вести на Viber

Цените во големите синџири маркети се променети. Утринската посета на дел од поголеми ланци маркети во главниот град покажува дека основните продукти кои беа опфатени со владината одлука имаат нови пониски цени.

Млекото, дел од тестенините се со пониски цени. Дури и сирењата и кашкавалите имаат благо намалени цени. Па така на пример во дел од маркетите може да се најде трајно млеко и за 61 денар, но тоа е само во маркетите кои важат за поевтини, односно кои имаат пониски маржи. Во дел од синџирите маркети млекото се продава по цена од 65 до 72 денари.

Граѓаните секако заинтересирани за одредбата, прво прашуваат дали млекото има пониска цена, па потоа купуваат.

-  Прво прашав дали млекото се продава по намалена цена, па потоа земав. Гледам дека имаат истакнато нови цени, ама да си прашам дали и на каса се сменети цените – вели една скопјанка која ја затекнавме во голем маркет во гратскиот трговски центар.

За потсетување Владата донесе одлука за намалување на цените на тестениние и на млечните производи за 15 и 10 проценти. Одлуката ќе се применува до 31 мај 2023 година.

Од маркетите накратко велат дека одлуката се почитува и дека од денеска имаат нови цени на дел од производите опфатени со мерката. Покрај млекото, со нови цени се и урдата, павлакта, јогуртот...

Синоќа се огласи и првиот човек на Државниот пазарен инспекторат, Горан Трајковски кој потенцираше дека од денеска на терен ќе бидат инспекторите кои ќе контролираат дали се почитуваат одлуките на Владата за намалвуање на цените на тестенините, млекото и млечните производи.

- Трговците имаат обврска да ги усогласат цените, во спротивно ќе следуваат високи казни, без селекција! Работиме во интерес на граѓаните! Се носат позитивни одлуки и решенија, а следува намалување на цени и на други основни производи!Ваквите мерки очекувам да бидат поттик за трговците самоиницијативно да ги намалат цените и на останатите производи кои се неопходни за граѓаните – напиша Трајковски на Фејсбук.

Надлежните исто така најавуваат анализи за можни понатамошни мерки за замрзнвуање или намалување на цените на основните прехрамбени производи. Вицепремиерот за економски прашања Фатмир Битиќи најави дека се следат и цените на овошјето и зеленчукот кои, исто така, ако трговците, но и производителите сами не ги намалат, можно е Владата да реагира со нова Одлука.

П.О. 

Фото: Принтскрин/Фејсбук