ФАКТОР НА ДЕНОТ: Филипче најави дека ќе се ограничуваат цените во приватните болници, на повидок е решение и за Законот за државјанство

Добивај вести на Viber

ЌЕ СЕ ОГРАНИЧАТ ЦЕНИТЕ ВО ПРИВАТНИТЕ БОЛНИЦИ ЗА ЛЕКУВАЊЕ НА КОВИД ПАЦИЕНТИ

Министерот за здравство Венко Филипче денеска соопшти дека на утринскиот состанок на Кризниот штаб бил прифатен прелогот да се направи измена на Законот здравствена заштита со која на приватните болници ќе се ограничи висината на финансиските средства за време на кризата, а тоа ќе се однесува само на лекување на ковид пациенти.

Како што изјави Филипче, главниот координативен кризен штаб утре до Владата ќе поднесе измени на Законот за здравствена заштита.

ЗАЕВ ВЕЛИ ДЕКА НАШОЛ РЕШЕНИЕ СО СЕЛА И ГАШИ

Премиерот Зоран Заев по средбата со лидерите на коалицијата Алијанса и Алтернатива - Зијадин Села и Африм Гаши, објави дека до крајот на неделата ќе се оформи нов законскиот текст за државјанствата, а следната недела ќе се изјасни Собранието, без да дава повеќе детали.

Со тоа, премиерот најави дека ќе следува повлекување на амандманите за законите за петиот пакет на економски мерки од страна на опозициската коалиција.

- Станува збор за опфат на 2.727 барања за државјанство за 3.200 граѓани, од кои преку 1.500 се граѓани кои не живеат овде, туку само дошле, рече Заев и дополни дека најмногу од барањата се преку склучување на брак.

ДЕНЕС ИМА 34 ПОЧИНАТИ ОД КОРОНАВИРУСОТ

Министерството за здравство информира, согласно податоците од Институтот за јавно здравје:

Во последните 24 часа се направени 1.192 тестирања, а регистрирани се 193 нови случаи на КОВИД-19 во:

Скопје – 110, Прилеп – 16, Кавадарци – 15, Куманово – 12, Штип -9, Тетово – 7, Кочани и Кичево – по 4, Велес – 3, Битола, Струга и Дебар – по 2, Охрид, Струмица, Неготино, Гевгелија, Свети Николе, Валандово и Македонски Брод - по 1.

Регистрирани се 1.014 оздравени пациенти. 

ПРЕМИЕРОТ ТВРДИ ДЕКА ЗАКОНОТ ВАЖИ ЗА СИТЕ

Премиерот Зоран Заев рече дека уапсениот Александар Ушилковски, кај кого била пронајдена поголема количина на пари и оружје, по акцијата на МВР за заплена на канабис во вредност од 800.000 евра на Плетвар, не е вработен во фирмите на неговата фамилија, ниту дека му бил возач на братучедот и бизнисмен Трајче Заев.

МАРИЧИЌ Е ГОРД НА „ШАРЕНАТА РЕВОЛУЦИЈА“

Бојан Маричиќ, министерот за правда, на денешната панел-дискусија за петгодишнината од формирањето на „Шарената револуција“ рече дека од денешен аспект е горд на тоа што никогаш на протестите организирани од ова движење не било користено насилството и тие останале доследни.