ФАКТОР НА ДЕНОТ: Македонија протерува руски дипломат, во меѓувреме се појавија нови снимки од конгресот на СДСМ
Објавено во: Македонија 18 Мај, 2021
МАКЕДОНИЈА ПРОТЕРУВА РУСКИ ДИПЛОМАТ
Дипломат од амбасадата на Русија во Скопје е прогласен за непожелна личност и треба да ја напушти Македонија за седум дена, информира Министерството за надворешни работи.
„Министерството за надворешни работи, согласно член 9 од Виенската конвенција за дипломатски односи, одлучи да прогласи еден дипломат на Амбасадата на Руската Федерација за непожелна личност во Република Северна Македонија. Во оваа насока, на 14 мај 2021 година, во просториите на Министерството за надворешни работи беше повикан Амбасадорот на Руската федерација, при што беше врачена нота со која се наложува на посочениот дипломат да ја напушти територијата на Северна Македонија во рок од седум дена, информираат од МНР.СЕ ПОЈАВИЈА НОВИ СНИМКИ ОД КОНГРЕСОТ НА СДСМ
Нови аудиоснимки од затворениот дел на Конгресот на СДСМ кој се одржа во неделата излегоа денеска во јавноста. По објавата на аудиото од говорот на екс заменичката Радмила Шекеринска и на Владимир Митревски, вчера, сега на нова страница на фејсбук поставени се делови од обраќањата на Максим Димитриевски, градоначалникот на Куманово и на Хазафер Амруловски од Центар Жупа. Се поставуваат на страницата „Оставка на Заев“ откако вчера наеднаш исчезна страницата „Реформи во СДСМ“, каде беа аудијата од Шекеринска и Митревски.
Димитриевски вели дека некои општински организации се претвориле во здруженија на мали групи и дека има примери со кои партијата наликува на ВМРО-ДПМНЕ.ПОЛИЦИСКИОТ ЧАС ОСТАНУВА
Активните мерки за ограничување на движењето поради КОВИД-19 се продолжени. Полицискиот час останува на сила до 1-ви јуни.
На денешната 71-ва седница, на препорака на Комисијата за заразни болести, Владата донесе заклучок активните мерки за ограничување на движењето наместо до 18 мај, да продолжат со важност до 1 јуни 2021 година.ДЕНЕС ИМА 83 НОВИ СЛУЧАИ НА КОРОНАВИРУС
Министерството за здравство информира, согласно податоците од Институтот за јавно здравје:
Во последните 24 часа се направени 2.704 тестирања, а регистрирани се 83 нови случаи на КОВИД-19 во:
Скопје – 40, Прилеп – 8, Куманово и Охрид – по 6, Тетово и Радовиш – по 5, Битола – 3, Струга и Кичево – по 2, Кавадарци, Струмица, Свети Николе, Берово, Демир Хисар и Пехчево – по 1.
Регистрирани се 259 оздравени пациенти од:
Скопје – 128, Куманово – 25, Битола – 21, Тетово и Струмица – по 10, Виница – 9, Прилеп – 8, Штип – 7, Кичево – 6, Велес – 5, Гостивар – 4, Ресен, Радовиш и Дебар – по 3, Кавадарци, Кочани, Гевгелија, Неготино, Берово и Пробиштип – по 2, Охрид, Свети Николе, Крива Паланка, Богданци и Демир Хисар – по 1.
Пријавени се вкупно 2 починати лица: 1 лице од Скопје (67г) и 1 лице од Кавадарци (80г). Од пријавените, двете лица се починати во болнички услови.ВЛАДАТА ДАДЕ НЕГАТИВНО МИСЛЕЊЕ ЗА ЕДНА ИЗБОРНА ЕДИНИЦА
Владата дала негативно мислење за Предлог-законот за изменување и дополнување на Изборниот законик со кој треба да се воведе една изборна единица и на тој начин помалите партии да имаат погоплеми шанси за повеќе пратенички места доколку настапуваат независно.
Предлогот на законското решение е поднесен од: пратениците на ЛДП, Моника Зајкова и Боби Мојсоски, на ДС, Павле Трајанов, ДОМ, Маја Морачанин и Мирослав Богдановски, на Левица, Димитар Апасиев и Борислав Крмов, на ВМРО-НП, Љупчо Балкоски и на пратеникот од Коалицијата предводена од СДСМ, Панчо Минов.ДПИ ДОБИ НОВ ДИРЕКТОР
Владата назначи нов директор на Државниот пазарен инспекторат.
На предлог на Комисија за именување, Владата ја именуваше Анета Симеска Димоска за в.д. директор на Државниот пазарен инспекторат.
Таа е дипломиран инженер технолог и магистер по бизнис администрација со специјалност за комерцијална ревизија на финансиски извештаи во услови на примена на информациските технологии. Има 28 годишно работно искуство, од кои 19 години како државен пазарен инспектор, а од 2017 до 2020 година беше пратеник во Собранието.ЧИТАЈТЕ УШТЕ
Лани 10 милиони евра повеќе потрошени за лекови во болниците и поликлиниките, помалку во аптеките