Филипче: Испишана е историја, за прв пат е трансплантирано срце од починат дарител
Објавено во: Македонија 23 Мај, 2020
Министерот за здравство, Венко Филипче денеска на прес - конференција изјави дека е испишана историја затоа што за прв пат во земјава е трансплантирано срце од починат дарител.
Вели дека ова го прави многу горд, и ова е чин на човекољубие.
Тој се надева дека ова ќе биде добар пример за во иднина.
„Здравјето на граѓаните е на прво место“, вели Филипче, и додаде дека тројца лекари ги обединиле знаењата за да се случи оваа интервенција.
Професор доктор Сашко Јовев вели дека трансплантацијата била круна на кардиохирургијата.
„Покажавме дека заедно сме појаки и можеме многу. Пациентот е добар, се надеваме дека ќе биде добар“, рече тој.
Јовев се надева дека ќе имаме што повеќе донори.
Доцент доктор Маја Мојсова вели дека ова немаше да биде успешно, доколку семејството не ги донирало органите.
Доктор Жан Митрев изјави дека ова беше неминовно и мораше да се случи. Се заблагодари на Филипче, затоа што ги сплотил, а целта е една, да се лекуваат пациентите. Вели дека сето ова е една голема, успешна приказна.