ФОКУС НА ДЕНОТ: Лидерите согласни дека Македонија нема алтернатива освен ЕУ, избори на 12 април
Објавено во: Македонија 20 Октомври, 2019
Предвремени парламентарни избори ќе се одржат на 12 април 2020 година.
СДСМ побара предвремени парламентарни избори да се одржат на 22 или 29 декември. Но, претставниците на ВМРО-ДПМНЕ побарале друг термин, во март или април. Сепак, постигната е согласност за 12 април. Идната година треба да се реализира и пописот, но по завршување на предвремените парламентарни избори.
„Тој датум ќе биде Велигден и од тој датум почнуваат и постите за муслиманите, па одлучивме тоа да биде и датумот на избори“, рече премиерот Зоран Заев.
Претседателот на државата, Стево Пендаровски претходно рече дека најдобро би било тоа да се случи по пристапувањето во НАТО, бидејќи е потребен функционален Парламент кој ќе треба да го ратификува пристапувањето откако тоа ќе го направат сите 29 земји членки на НАТО.
Во дел од медиумите се појавија информации дека министерот за внатрешни работи, Оливер Спасовски ќе биде технички премиер.
Сепак, за ова прашање уште нема договор.
Сепак, премиерот Зоран Заев рече дека тоа дополнително ќе се договара во СДСМ.
Според лидерот на ВМРО-ДПМНЕ, Христијан Мицкоски завршува арамилукот, срамот, неправдите и назадувањето донесено од Зоран Заев и оваа влада. Тој ова го напиша на Фејсбук.
Заеднички интерес е најпрво да се ратификува протоколот за наше членство во НАТО од сите земји членки и од нашето Собраните и да се усвои законот за одбрана, изјави по лидерската средба Али Ахмети, лидерот на ДУИ.
Претседателот на Алијансата за Албанците, Зијадин Села по вечерашната лидерска средба рече дека 12 април е датум за промени и за враќање на демократијата.
Неопходно беше да се оди на предвремени избори откако се случи француското вето во Брисел, изјави Биљал Касами, лидерот на движењето Беса по денешната лидерска средба.
Заклучоци на Европскиот совет и можноста за предвремени избори се двете теми за кои се разговарало на лидерската средба кај шефот на државата, Стево Пендаровски.
Вели дека Македонија по трет пат е во ваква ситуација. Лидерите кажале „не“ за какви било други алтерантиви.
„Стојат зад идејата Република Северна Македонија што е можно поскоро да ги почне и што е можно поскоро да ги заврши тие преговори со Европската Унија, за да стане членка“, рече Пендаровски.
Лидерите рекле дека немаат проблем со новата методолигија, односно онаа која ќе подразбира реверзибилен процес.