ФОКУС НА ДЕНОТ: Се слави Денот на македонската револуционерна борба, лидерите почнаа со предизборна реторика

Добивај вести на Viber

Националниот празник Денот на македонската револуционерна борба, или популарно Денот на ВМРО, се одбележува денеска како неработен ден.

На денешен датум во 1893 година во куќата на Иван Хаџи Николов во Солун, Христо Татарчев, Даме Груев, Петар Поп Арсов, Антон Димитров и Христо Ботанџиев беше формиран Македонскиот револуционерен комитет од кој подоцна произлезе Внатрешно македонската револуционерна организација (ВМРО).

Поранешниот претседател на Македонија, Ѓорѓе Иванов, упати честитка по повод националниот празник Денот на македонската револуционерна борба - 23 Октомври.

„Почитувани сограѓани, Одбележувањето на 23 Октомври, Денот на македонската револуционерна борба, е празнување на идејата за самостојна и независна Македонија. Овој ден претставува завет на македонските револуционери, предвесник на Македонската Револуционерна Организација, симбол на непокор, патриотизам и правда.

Шефот на македонската Влада, Зоран Заев, денеска пред новинарите рече дека на крајот на декември ќе биде одлучено кој ќе биде техничкиот премиер кој ќе го замени до предвремените парламентарни избори во април следната година.

- Техничкиот премиер ќе биде познат во декември, по консултациите во самиот СДСМ и со коалициските партнери. Доколку формираме нова Влада, јас ќе продолжам да бидам премиер, тоа е веќе познато, бидејќи јас ќе ја водам изборната кампања, рече премиерот Заев денеска во Бунарџик.

Toj го потврди ставот на поранешниот грчки вицепремиер Евангелос Венизелос дека реализацијата на Преспанскиот договор е врзано со интеграцијата на Македонија во ЕУ и дека внатрешната употреба на името, односно „Ерга Омнес“, зависи од тоа дали земјата ќе започне преговори со ЕУ.

Христијан Мицкоски, лидерот на ВМРО-ДПМНЕ, во денешниот говор во Прилеп најави дека доколку неговата партија успее да дојде на власт по предвремените парламентарни избори во април ќе биде испитано потеклото на имот на сите политичари.

- ВМРО-ДПМНЕ ја запали машината и ќе ја донесе победата. Ќе покажеме како одговорно се владее. Јас не влегов во политиката за корист, за кауза и за идеал. Мојата цел е успехот. Вие сте нашата сила, а силата ја прават сплотени луѓе. Ќе победиме заедно со срца кои чукаат како едно. Кажете по улиците и маалата дека обновата доаѓа, рече Мицкоски пред прилепчани.

ВМРО-ДПМНЕ во салата „Марко Цепенков“ го прославуваше националниот празник, а Мицкоски им се обрати на кандидатите кои ќе ја застапуваат ВМРО-ДПМНЕ на следните избори и порача дека ќе бара отчетност и одговорност и од нив. Додаде и дека Зоран Заев ќе „падне“ затоа што тргувал со свети работи, а за возврат не добил нешто.