ФОКУС НА ДЕНОТ: Спасовски нема да дозволи уцени, кој има лиценци за одгледување на канабис?

Добивај вести на Viber

Mинистерот за внатрешни работи Оливер Спасовски, вели дека Македонија е секуларна држава и не прифаќаат никакви уцени, говорејќи за ултиматумот од Исламската верска заедница. 

Спасовски вели дека апсолутно е непримерно во услови кога станува збор за судската власт и постапки пред судовите да имаме комуникација на уцени и закани. Тој повика на дијалог и потенцира дека недозволиви се уцени од било кого.

„Сметаме дека заканите се неприфатливи од било кого доаѓаат, во случајов се работи за едно писимо на ИВЗ кое е сериозна уцена. Повикувам на сериозен пристап, на одговорни луѓе личи добра комуникација. Оваа Влада на чело со Зоран Заев покажа дека има сериозен капацитет за дијалог и разговор, во тој дух да разговараме со секого, но никако нема да дозволиме уцени од било кого“, изјави Спасовски.

Личниот адвокат на премиерот Зоран Заев, Ване Андреев, е еден од сопствениците на  „Канабис ОНЕ Доо Струмица“, нова компанија за производство на канабис за медицински цели, објави Економски Лидер.

Покрај Андреев, во сопствеништвото на компанијата се јавуваат и компанијата „Летерс ДОО – Ресен“, Зоран Јанев, Крис Алман од САД, Славчо Васков – Пинда, како и Сара Еленова од Кавадарци. 

Економски Лидер тврди дека Заеви се сопственици на една од осумте лиценци за одгледување на канабис, преку компанијата „МАМ“, која е во сопственост на братучедот на премиерот Трајче Заев а дел од управните структури е и неговиот брат Вице Заев.

Стево Пендаровски, кандидатот на владеачкото коалициско мнозинство за претседател на Македонија од 1 април ќе ја започне официјалната кампања со слоганот „Заедно Напред!“.

Програмата на Пендаровски ќе се темели на  заедништво, на обединување на граѓаните и на забрзан развој на земјата на патот кон НАТО и ЕУ. Пендаровски ќе ја започне кампањата со централен митинг од Прилеп во 20:00 часот.

Вицепремиерот за евроинтеграции Бујар Османи денеска побара од Европската комисија да го земе во предвид и доброто чување на јужната граница во контролирањето на бегалската криза и илегалната емиграција пред да одлучи дали ќе и додели датум за преговори на МАкедонија.

– Во ситуација кога европскиот проект се повеќе се напаѓа и загрозува, Република Северна Македонија станува школски пример како главните елементи на големата европска идеја се применуваат практично во една држава која се уште е само кандидат за членка на ЕУ и затоа очекувам нашиот сериозен ангажман на сите полиња во изминативе 20 месеци да заврши во јуни со добивање датум за почеток на преговорите со ЕУ, изјави денеска Османи на граничниот премин „Богородица“ каде што беа во заедничка посета со министерот за внатрешни работи Оливер Спасовски.