ФОКУС НА ДЕНОТ: Уапсен Боки 13, Јанева си даде оставка

Добивај вести на Viber

Доколку обвинителството обезбеди докази во истрагата за други лица, и за нив ќе има одговорност, уведи обвинителот Љубомир Јовески на прес-конференција денеска откако сопственикот на 1 ТВ Бојан Јовановски беше уапсен на граница. 

Јовановски по налог на Основното јавно обвинителство за организиран криминал денеска е задржан на испрашување. Тој бил приведен на еден од граничните премини. Уапсено е уште едно лице.

Лицата се сомничат дека сториле кривично дело Примање награда на незаконит начин, за кое се собрани повеќе вербални и материјални докази, изјави на прес конференција обвинителката Вилма Рускоска.

Од ноември лани, до април годинава, првоосомничениот влијаел преку јавен обвинител да се олесни кривичниот прогон кон одредено лице за кое се водело постапка.

Од лицето на кое му помогнале во неколку наврати примиле еден и пол милиони евра како поткуп.

За да продолжат да му помагаат било договорено да примат уште 5 милиони евра како награда.

Откако се посомневале дека средбите со него може да бидат компромитирани, веќе не одржувале средби.

Првосоомничениот се сомничи и за перење пари, што значи дека нелегално земените пари ги користел за лични задоволства, одмори, облека и друго.

Инаку денеска беа приведени на информативен разговор Бојан Јовановски, неформален сопственик на 1 ТВ и Зоран Милевски викан Кичевец.

Обвинителството побара притвор за двајцата осомничени.

Катица Јанева, шефицата на Специјалното јавно обвинителство, попладнево поднесе оставка откако премиерот Зоран Заев најави дека в петок ќе има лидерска средба на која на дневен ред ќе биде и Предлог-законот за Јавно обвинителство.

„Во моментот кога со консензус на сите политички партии бев избрана за Специјален Јавен Обвинител, себеси и на граѓаните на Република Северна Македонија ветив дека функцијата Специјален јавен обвинител ќе ја извршувам во интерес на владеењето на правото и борбата против криминалот и корупцијата во Република Северна Македонија. Се нафатив на функцијата во исклутелно тешки околности и целосно свесна за задачата која ми е дадена.

Чест ми беше да и служам на државата и да бидам на чело на исклучително професионален обвинителски тим, истражителски тим и тим на вработени кои безрезревно и посветено ги извршуваат своите работни задачи. Со месеци ги следам медиумските прилози за преговорите меѓу работните групи на политичките партиите за иднината на Специјалното јавно обвинителство. Еве, денес ја користам приликата да ја информирам јавноста дека јас нема да дозволам моето име да биде искористено за нечие алиби со кое во заложништво ќе се држат судбината на Специјалното јавно обвинителство и Европските интеграции на мојата земја.

Ја депонирам мојата оставка која ќе стане активна тогаш кога политичките партии ќе се усогласат за новото законско решение и ќе го изберат мојот наследник“, се вели во соопштението.

Републичкиот јавен обвинител Љубомир Јовески денеска на прес-конференцијата во обвинителството изјави дека оставката на Катица Јанева е личен чин и не би ја коментирал.

Катица Јанева денеска си поднесе оставка која како што вели, ќе стане активна кога политичките партии ќе се усогласат за новиот закон и ќе го изберат нејзиниот наследник.