ФОКУС НА ДЕНОТ: Заев и Мицкоски се конфронтираа за Договорот од Преспа, СЈО, „крвавиот четврток“
Објавено во: Македонија 26 Март, 2019
Во тв дуел, премиерот Зоран Заев и лидерот на ВМРО-ДПМНЕ, Христијан Мицкоски ги спротивставија своите ставови за повеќе важни прашања за државата.
Премиерот Зоран Заев вечерва во тв дуелот со претседалот на ВМРО-ДПМНЕ, Христијан Мицкоски изјави дека во текот на преговорите сфатил дека ќе мора да прифати „ерга омнес“, откако е потврдено дека ќе биде заштитен идентитетот.
Вели дека Илинденска Македонија за него било прифатливо, но и за неговиот грчки колега, Алексис Ципрас.
Мицкоски вели дека Договорот од Преспа значи себеодрекување.
Заев побара Мицкоски да го осуди јавно насилството кое се случи на 27 април 2017 година во Собранието.
Мицкоски рече дека неколку пати го осудил насилството, и рече дека никогаш не треба да се повтори. Го осуди и чинот кој доведе до тоа насилство, но и казните од два века.
Тој казните ги спореди со оние изречени за луѓето кои се вратиле од Сирија, и биле припадници на ИСИС, а се три пати помали.
Премиерот Зоран Заев на тв дуелот на Канал 5 со претседателот на ВМРО-ДПМНЕ, Христијан Мицкоски вечерва изјави дека опозицијата никогаш не кажува јасен став.
Прашува дали сега сакаат да ја блокираат земјата на патот кон ЕУ.
„Република Северна Македонија наоѓа патишта, еве најде и по референдумот, и ќе најде патишта, но почесно е да кажете дали сте против НАТО и ЕУ“, вели Заев.
Исламската верска заедница поради изборите привремено го повлекува ултиматумот кој го испорача претходно до Владата, а истото беше протолкувано како уцена.
Тие велат дека нема уцена, но има дискриминација. Повикаа за надминување на проблемите, откако вчера премиерот Зоран Заев рече дека зад писмото на Исламската верска заедница гледа лични интереси, и дека како и сите други религиски заедници и ИВЗ треба правдата за имотите да ја бара на суд.
Талат Џафери, претседателот на Собранието, денеска изјави дека нема да се објавуваат закони во Службен весник се додека не си замине, односно не истече вториот мандат на шефот на државата Ѓорѓе Иванов.
На Иванов последниот работен ден му е 12 мај, а законодавниот дом најверојатно ќе работи и во април во текот додека трае кампањата за претседателските избори за повторно да ги изгласа реформските закони кои тој ги врати на повторно прегласување.