Добивај вести на Viber
„Никола“ пишува на дресот од јапонската фудбалска репрезентација, што премиерот Никола Груевски го доби од неговиот јапонски колега Шинзо Абе. Возвратно, тој му подари дрес од македонската фудбалска репрезентација со името на јапонскиот премиер.
На двата дреса е бројот 20 во чест на 20-годишнината од дипломатските односи меѓу двете земји.
Според соопштението од владината прес-служба, на заедничката средба Груевски и Абе позитивно ги оцениле политичките односи на билатерален и на мултилатерален план. Премиерите на двете земји истакнале заложба и личен ангажман за унапредување и продлабочување на економските односи, економската соработка, трговската размена и соработката на полето на инвестициите.
„Разговаравме и за другите видови на соработка, соработката во образованието каде што Јапонија го зголемува бројот на стипендии за студенти од Република Македонија, и за секаков вид на друга соработка, во областа на културата, во областа на економијата каде што најмногу се задржавме, така што можам да кажам дека средбата беше одлична и продуктивна и се надевам дека сите овие наши напори да привлечеме повеќе компании во Македонија ќе вродат со плод“, истакна премиерот Груевски по средбата.
Груевски ја иницирал и темата околу можностите за склучување на билатерални договори за одбегнување на двојното оданочување и за заштита на инвестициите.