ФРЛЕНИ МИЛИЈАРДИ ЗА НИКАКОВ ЕФЕКТ: Додатокот за трето дете оди во историјата
Објавено во: Економија 08 Ноември, 2018
Поради немањето ефект од мерката која ја воведе поранешната влада, додатокот за трето дете ќе се укине.
Ова се предвидува во законските измени за заштита на децата а по разгледувањето на владина седница кое претстои , одлуката ќе се усвојува во Собранието.
Фактор неодамна пишуваше дека за девет години Владата потрошила безмалку 208 милиони евра за исплата на додатокот за трето и четврто дете.
Во истиот тој период бројот на новородени деца паднал. Фактор побара и доби податоци од Министерството за труд и социјална политика. Анализата покажува дека и покрај сумата која е издвоена да се помага родителството на повеќедетни семејства, мерката воопшто не го дала очекуваниот резултат. Од Министерството дури велат дека, ако се сакало да се помогнат посиромашни семејства, тоа не е постигнато затоа што пари добивале побогатите.
Тогаш од МТСП открија дека се подготвува нов закон но не открија дали додатокот ќе се укине.
Со измените, додатокот за трето дете кој постои безмалку 10 години ќе замине во историјата.
Наместо досегашната пракса надлежните предвидуваат да се доделува еднократна помош за секое родено дете. За прво дете висината на еднократната парична помош предвидено е да изнесува 5.000 денари, за второ 20.000 денари, а за трето новороденче 60.000 денари“, информираат од Министерството за труд и социјална политика.
Додека за тоа има дилема во јавноста и во Министерството сметаат дека стимулацијата воопшто не била креирана како што треба.
„Податоците покажуваат дека самата мерка нема никаков ефект врз наталитетот односно стапката на наталитет опаѓа, од 13,3 во 2001 година до 11,1 во 2016 година, но и дека истата била лошо дизајнирана од самиот почеток. Така, на пример, додаток за трето дете добивале семејства кои се во многу добра економска состојба и немало никакво ограничување во однос на ова“, рекоа за Фактор од Министерството за труд и социјална политика.