Генерали инвестментс: Обврзниците се скапи, бидејќи приносите се мизерни

Добивај вести на Viber

Портфолио менаџерите во Генерали Инвестментс составија резиме за тековните случувања кои влијаат врз пазарот на капитал и актуелни совети за инвеститорите.

Преглед на моменталните случувања:

Ноември донесе нови рекорди. Пазарите на капитал на крилата на ликвидноста продолжуваат да растат. Состанокот на ФЕД предвиде намалување на ликвидноста, па ФЕД ќе го намали тековното купување на обврзници од 120 милијарди долари месечно за 15 милијарди долари месечно па така во 2022 година ќе престане да купува. Веројатноста за пораст на каматните стапки се намали по оваа објава. На сличен начин комуницира и ЕЦБ, но предвидува дека сигурно нема да има зголемување на каматните стапки во 2022 година, додека откупите, а со тоа и промоцијата на ликвидноста засега остануваат недопрени.

САД го одобри законот за инфраструктура со кој се обезбедуваат повеќе од 1.000 милијарди долари нови инвестиции. Всушност, само добра половина од сумата се троши за инфраструктура, а останатото се помали проекти од различни области кои политичарите ги донесоа пред да се донесе  официјално законот од Конгресот и Сенатот. Но, овие средства дадоа нов поттик на пазарот.

Дури и малку подзаборавената пандемија добива на интензитет во последниве недели. Очигледно, вакцината слабее по само неколку месеци и бројот на заразени е во пораст практично насекаде во Западна Европа. Ова се совпаѓа со традиционалната сезона на настинки и грип, што има негативно влијание врз болничките капацитети. Како резултат на тоа, гледаме дека затворањето на јавниот живот се враќа на трпезите на политичарите, кои повторно ќе влијаат на економските текови со затворање на економијата. Доаѓа до израз прашањето колкава ликвидност централните банки можат да повлечат во таков амбиент.

Цената на енергијата и материјалите останува висока, што продолжува да ги поттикнува инфлациските очекувања. Реториката на централните банки се промени во насока на очекување повисока инфлација во текот на следната година, но во втората половина на 2022 година се очекува намалување на притисоците и намалување на инфлацијата. Бидејќи инфлацијата останува една од најнепредвидливите економски категории, шпекулациите за втората половина на 2022 година се бесмислени. Нафтата останува над 80 долари, бидејќи ОПЕК + не ја засили екстракцијата, што е многу интересно, а очигледно геостратешките позиции се малку променети по повлекувањето на САД од Авганистан. Иако администрацијата на Бајден изврши голем притисок за зголемување на екстракцијата на нафта, земјите од Персискиот залив останаа обединети и покажаа дека сакаат повисоки цени – се зборува за 100 долари за барел. Дури и во Европа, цените на гасот и електричната енергија, по корекцијата во последните неколку недели, го продолжија својот бавен нагорен пат. Континуираните ограничени испораки на гас од Русија и предвиденото постудено време предизвикуваат значителна непријатност и кај потрошувачите и кај политичарите.

Навестената желба на кинескиот претседател да го промени законодавството за да го направи новиот Мао, доживотен претседател, предизвика вознемиреност кај западните инвеститори. Пленарната партиска седница за време на викендот ќе послужи како нова насока за државата, но засега средбата се одвива зад затворени врати. Инвеститорите и следствено на тоа пазарот на капитал остануваат внимателни.

Пазарите на капитал остро се променија по состанокот на ФЕД. Придобија и акциите и обврзниците. Потребните приноси на американските обврзници се значително намалени поради пониските очекувања за зголемување на каматните стапки, а американската 10-годишна обврзница моментално се движи околу 1,45%, додека германската обврзница околу -0,26%. Ова е значителна промена во последната недела. Благо зајакна и доларот и е на ниво од 1,15 долари за евро. На берзите, американските и европските акции се во првите редови, додека Азија заостанува.

Резултатите од третиот квартал, кои полека привршуваат, даваат подобар одзив и во Европа и во САД. Надминати очекувања и подобрени прогнози беа забележани во ИТ индустријата, додека значителен пад беше забележан кај материјалите, со што се очекува Кина да ја намали потрошувачката на суровини. Црвена нишка на резултатите се логистичките проблеми, кои се очекува да имаат силно влијание врз некои компании  до средината на следната година. Тоа е особено видливо кај основните производи за широка потрошувачка, во кои спаѓаат најголемите „домаќински“ компании, како на пр. Нестле, Хенкел или P&G. Заедничко за сите нив е тоа што цените на суровините растат побрзо од крајните цени, што ги притиска нивните маржи. Со додавање на логистичките проблеми на сето тоа, очекуван  е негативниот одговор на инвеститорите. На корпоративно ниво, вреди да се спомене Alphabet (Google), кој по добрите резултати стана нова компанија вредна повеќе од 2.000 милијарди.  Друга технолошка компанија која брзо се приближува до границата од 1.000 милијарди долари е Nvidia чија цена се зголеми од 200 на 300 долари во последниот месец. Покрај технолошките акции, меѓу инвеститорите и понатаму се популарни акциите на Pfizer, кои предизвикаа пораст поголем од 10 отсто со најавата на новата таблета против ковид-19. Од друга страна, акциите на другите производители на вакцини, како Модерна и Бионтек, паднаа за 20 или повеќе проценти. Дали ова ќе биде подолг тренд или продолжува да биде само една голема флуктуација во индустријата која некогаш беше позната по големата стабилност, останува да се види, но факт е дека акциите на големите фармацевтски компании продолжуваат да бидат евтини.

Усвојувањето на Законот за инфраструктура во САД побуди донекаде заспан интерес за акциите на индустриските компании, но нагорната патека овде е селективна и релативно ограничена поради високите вреднувања во споредба со минатото. Оттука, фокусот е ставен на енергијата и финансиите, каде што пониските вреднувања и против инфлациската игра остануваат главен двигател на интересот на инвеститорите.

Совети за инвеститорите:

Насоката на пазарите е диктирана од очекувањата за нивото на каматните стапки и ликвидноста обезбедени од централните банки. Обврзниците се скапи, бидејќи приносите приспособени за инфлациските очекувања се мизерни, главно негативни и заедно со негативните банкарски приноси, инвеститорите продолжуваат да бидат принудени главно на инвестиции во акции и недвижен имот. Диверзификацијата на портфолиото останува приоритет и препорачливо е портфолиото да се подели на различни класи, меѓу акции, обврзници или пари.

Очекувањата за инфлација растат, а повисоката инфлација веројатно ќе трае најмалку цела 2022 година. Технологијата, е-трговијата и акциите на компании за работа од дома се сегменти со натпросечен раст на бизнисот базиран на долгорочни трендови, така што тие остануваат атрактивни, но пониските прогнози со најновите резултати во комбинација со високите вредности ги намалија очекувањата за раст. Инфлацијата останува нивниот главен непријател. Со високите вредности, геополитичките тензии и неизвесните идни политики на централната банка, инвеститорите стануваат повнимателни.

Несигурноста во технолошкиот сектор и азиските пазари се воведува со мешање на кинеските власти во економијата, самата структура и правила на пазарот. Инвестициите надвор од технолошкиот сектор остануваат атрактивни поради пониските вредности и различната динамика на развој на индустријата. Во последните недели, секторите енергетика, снабдување и финансии дојдоа до израз, како заштита од инфлација и се разбира, поради силниот раст на цените на енергијата, што се рефлектира и во нивните биланси. Пониските вредности во здравствената индустрија минатата недела поради обновениот обид за реформа на здравствениот систем во САД ја направија помалку привлечна.

Меѓу регионите, Европа се издвојува по атрактивност, на САД им треба поголема претпазливост поради големата тежина на ИТ компаниите, а Кина и нејзините пазари во развој остануваат ризични поради неодамнешните настани и со тоа помалку привлечни за пократкорочни инвеститори.

За трпеливи долгорочни инвеститори, поради поволните вреднувања, се појавуваат одредени можности за инвестирање. За мал дел од портфолиото, добрите приноси од дивиденда и привлечните вреднувања ја одржуваат атрактивноста на нашиот регион во Централна и Југоисточна Европа. Инвеститорите со долгорочни цели за штедење треба да истраат и да продолжат да вршат периодични плаќања, а оние кои би инвестирале поголем износ, истиот треба да го распоредат во подолг временски период. Дигитализацијата, автоматизацијата, е-трговијата, работа од дома, почистата енергија, водењето бизнис во согласност со општествените и нормите на животната средина и почитувањето на таканаречените препораки за ЕСГ се долгорочни трендови и фокусирањето на долгорочните трендови историски е важна компонента во постигнување на натпросечни приноси.