Георгиадис: Каменос нема да гласа затоа што знае дека нема да има договор за името со Скопје

Добивај вести на Viber

Грчкиот владин коалиционен партнер Панос Каменос нема да гласа, затоа што знае дека нема да има договор со Скопје за промена на името, смета потпретседателот на грчката опозициска партија Нова демократија, Адонис Георгиадис.

– Јас сум од оние политичари што уште на почетокот го истакнав моето мислење дека нема да постои никаков договор со Скопје и губиме многу време играјќи ја играта на Ципрас. И сето она силење од Каменос дека нема да гласа, е со сигурност, затоа што знае дека нема да дојде никаков договор. Зошто не може да дојде договор? Бидејќи договор што нема да биде ерга омнес, за сите, не може да помине во грчкиот парламент – вели Георгиадис во интервјуто за грчката телевизија Скај.

Коментирајќи ги последните изјави на Зоран Заев околу ерга омнес, потпретседателот на грчката опозициска партија рече дека тие ставови се идентични со оние на Груевски и затоа во 2008 Караманлис ставил вето во Букурешт. Тој се запраша што вели шефот на грчката дипломатија за овие изјави и дали Грција разговара за решение што нема да биде за севкупна употреба, ерга омнес.

 – Можеби господинот Ципрас поради неговите обврзувања кон различни странски фактори има разговарано за име што нема да биде за севкупна употреба? Не сакам да поверувам дека е така, затоа што тоа би било национална катастрофа – коментира потпретседателот на најголемата грчка опозициска партија.