Георгиевски: Жал ми е што во Бугарија не го ценат она што Владата на СДСМ го прави
Објавено во: Македонија 20 Ноември, 2019
Поранешниот македонски премиер, Љупчо Георгиевски вечерва во интервју на Тв 24 кажа дека нашиот пат кон Европската Унија ќе биде малку подолг, но важно е да тргнеме по тој пат.
„Тука останува чувството дека малку сме изиграни“, рече тој.
Георгиевски вели дека 30 работи земјава направила во сите овие години за да им се допадне на ЕУ. Ги наведе Договорот од Преспа, помагањето при косовската криза, децентрализацијата и ред други работи.
Изјави дека Франција не е единствена виновна за одбивањето Македонија да добие датум за преговори.
За условите од Бугарија, рече дека бугарските политичари како да се тркаат во својата ароганција кон Македонија. Вели дека тонот и стилот кој го наметнуваат повеќе може да наштети.
„Жал ми е што структурите во Бугарија не го ценат она што Владата на СДСМ го прави за да ги омекне работите, не знам како ќе заврши приказната“, рече Георгиевски.
Тој изјави дека „малиот Шенген“, би бил губење на време.
Вели дека ќе трошиме енергија, капацитети, па и пари на почеток, но реално нема што да добиеме.
Георгиевски вели дека пред 10 години оваа иницијатива би била добра за земјава, но не и сега кога се стремиме да преговараме со Европската Унија.