Германија ќе излезе од Шенген зоната?
Објавено во: Свет 18 Март, 2018
Новиот министер за внатрешни работи, Хорст Зехофер сака контролите на германските граници да ги задржи на неодредено време и да ги прошири и на останатите премини, со што Германија практично би излегла од Шенгенскиот систем.
Ова го објави денеска Велт ам зонтаг.
„Контролите на границите кон соседите мора да бидат толку долго на сила сѐ додека Европската Унија не успее да воведе поефикасна заштита и контрола на надворешните граници. Но не гледам дека тоа во догледно време може да ѝ успее“- изјави Зехофер од Христијанско-социјалната унија (ЦСУ).
Тој воедно најави дека контролите би требало да бидат проширени и на останатите германски гранични премини.
„Во моментов не се многу гранични премини во Германија трајно контролирани. Мора да зборуваме за тоа дали така може да остане. Не станува збор само за спречување на нелегалните преминувања на границата туку и за останатите заштитни функции“ - кажа Зехофер.
Во моментов Шенгенскиот систем на германско барање е укинат на германско-австриската граница и на барање на Данска на германско-данската граница.
Зехофер се заложи и за системско протерување на лицата на кои им е одбиено барањето за азил. Тој побара засилување на персоналот во судовите кои одлучуваат за азил и протерувања и им вети помош на сојузните држави во процесот на протерување на лицата за кои не постои правна основа за престој во Германија.
Новиот министер за внатрешни работи на Германија и доскорашен премиер на Баварија се залага и за промена на односот кон источните членки на ЕУ кои одбиваат да примат емигранти.