Германските компании во земјава бараат да не се шират лажни вести - ќе работиме и ќе се грижиме за здравјето

Добивај вести на Viber

Да не се шират лажни вести за странските компании што работат во Северна Македонија, побара денеска Патрик Мартенс, директор на Делегацијата на германското стопанство, во својата писмена објава до медиумите. 

Тој вели дека германското стопанство ќе им помогне на македонските компании. 

Синџирите на добавувачи одново ќе се позиционираат на светската мапа, нагласува тој. „Затоа, мрежата на Германските стопански комори во странство (АХК) од Северна Македонија, Србија, Босна и Херцеговина, Украина, Белорусија, Тунис и Мароко се обединија да ја понудат својата помош на Вашите компаниии при поставувањето на новата структура на синџирите на добавувачи. Планирани се заеднички маркетинг активности во соработка со релевантни германски трговски здруженија, со чија помош можете да ја пронајдете вистинската локација за пренасочување на Вашиот синџир на снабдување и да најдете можности за нови инвестиции. Фокусот е ставен посебно на автомобилската, електро и фармацевтската индустрија“, потенцира Мартенс.

Според него, подемот на Северна Македонија како дестинација за директни странски инвестиции доведе до бум во изградбата на индустриски објекти. Ова гледиште го има и иницијативата за извоз на енергија при Сојузното Министерство за економија и енергетика. Министерството организира Делегациско патување на тема: „Обновливи енергии и енергетска ефикасност во индустријата во Северна Македонија“. Она што ќе биде новина во врска со Делегациското патување е дека ќе се органзира виртуелно. „Стручната конференција и Б2Б состаноците ќе Ви овозможат да се запознаете со потенцијални клиенти. Доколку сте заинтересирани за Делегациското патување на оваа тема, Ве молиме контактирајте ја г-ѓа Марина Станков: stankov@nordmazedonien.ahk.de“, повикува Мартенс.

Тој нагласува дека вирусот корона, се разбира дека има влијание врз економскиот и работниот процес на странските инвеститори во Северна Македонија. Инвеститорите ги презедоа сите заштитни мерки и доследно ги спроведуваа владините препораки на начин на кој што им беше препорачано да се примени во индустриското производство. 

„И покрај тоа во изминатите недели се зголемија лажни вести за странските инвеститори во земјата. Овие лажни вести во оваа тешка состојба не се од корист ниту за компаниите ниту пак за вработените. Со повторно стартување на производство, компаниите ќе сторат сé за да ја исполнат својата одговорност за зачувување на здравјето на вработените. Рестартирањето на производството ќе даде значаен придонес во одржувањето на општеството и државата“, пишува Мартенс.