ГИ ПАЛАТ ХИЏАБИТЕ, СИ ЈА СЕЧАТ КОСАТА: Жените во Иран не можат да го доискажат гневот по смртта на младата Махса Амини
Објавено во: Свет 23 Септември, 2022
Жените ширум Иран си ја сечат косата во знак на протест по смртта на Махса Амини,
22-годишната која беше уапсена од иранската полиција за морал, бидејќи не
носеше хиџаб.
Амини почина во петокот, три дена откако беше уапсена.
Моралните полицајци ги имаат сите овластувања на агенцијата за спроведување на законот и имаат задача да ги спроведуваат строгите кодекси за облекување во земјата за жените, вклучително и носење хиџаб во јавност за покривање на косата и вратот.
За време на прес-конференцијата во понеделникот, командантот на полицијата во Техеран, Хосеин Рахими, ги негираше тврдењата дека иранската полиција и наштетила на Амини на каков било начин и рече дека „се е направено“ за да се одржи во живот несреќното девојче. Нејзината смрт ја нарече „несреќна“.
По смртта на Амини, протести избија низ Иран, при што жените ѝ пркосат на полицијата на моралот со сечење на косата, симнување, па дури и палење на нивните хиџаби во јавност и облекување како мажи за да се борат против полицијата.
На видеата на социјалните мрежи се гледа како жени трчаат низ улиците на Техеран, како и во поконзервативните градови, упорно протестираат и извикуваат: „Жени, живот, слобода“.
Некои дури палат и уништуваат постери со слики на иранскиот
врховен водач, ајатолахот Али Хамнеи. Во меѓувреме, од петокот во земјата се
документирани и прекини на интернет - тактика што локалната власт ја користеше
во минатото за да го намали ширењето на протестите.
Смртта на Амини доаѓа во време на растечка контроверзност и отфрлање на кодексот на облекување за жените - кој важи од деветгодишна возраст и се однесува на граѓаните од сите националности и религии кои живеат во земјата, а не само за иранските муслимани.
Ова започна многу пред формирањето на сегашната Исламска Република. Во 1936 година, Реза Шах, владетел кој ги поддржуваше западните закони и идеали, се обиде да ја модернизира земјата со забрана на превези и шамии, но многу жени се спротивставија. Потоа, во 1979 година, исламскиот режим што следеше го наметна носењето хиџаб, а правилото беше запишано во закон во 1983 година, по што беше воспоставена полиција за морал.