ГИ ПРОВЕРИВТЕ ЛИ СМЕТКИТЕ: Од МојДДВ ќе легнат 5,6 милиони евра
Објавено во: Финансии 13 Мај, 2020
Веќе втор ден по ред тече исплатата на парите од МојДДВ за првиот квартал од годинава.
Во ова прво тримесечје од годината скенирани се 49.946.278 фискални сметки, направен е промет во износ 21.957.355.689 денари со вкупен ДДВ од 2.292.026.352 денари, велат од Управата за јавни приходи.
Повратот за ова тримесечје изнесува 343.803.953 денари, односно 5.590.000 евра. За донирање на својот поврат за овој квартал се изјасниле 8.700 граѓани.
Исплатата се врши во неколку етапи и ќе заврши согласно законскиот рок, односно во рок од 60 дена по истекот на календарското тримесечје во кое е издадена фискалната сметка.
Ова вчера на својот фејсбук профил ги објави и директорката на УЈП, Сања Лукаревска.
Дел од граѓаните на постот реагираа дека претходниот пат, односно за последното тримесечје лани парите биле исплатени уште во јануари, а сега тоа се случува дури во мај, иако требало во април. Сепак, треба да се има предвид дека земјата е погодена од економски последици од корона кризата, што го намалува износот на приходите што се собираат во државниот буџет.
Вкупниот број регистрирани корисници до 31 март 2020 година на апликацијата МојДДВ е 279.498.
Управата за јавни приходи апелира до граѓаните да ги проверат своите трансакциски сметки и доколку има грешки во нив, да ги коригираат со цел навремена и ефикасна исплата.