Годинава 21 разни напади на полицајци во Тетово и Гостивар
Објавено во: Македонија 21 Септември, 2021
Секторот за внатрешни работи Тетово во 2021 година има поднесено 21 кривични пријави за разни видови на напади врз полициски службеници.
Десет лица заработиле кривични пријави за „напад на службено лице при вршење работи на безбедноста“, пет за „учество во толпа што ќе спречи службено лице во вршење на службено дејствие“ и шест за „спречување на службено лице во вршење на службено дејствие“.
– Заклучно со 20 септември, во СВР Тетово изготвени и до Основните јавни обвинителства во Тетово и во Гостивар поднесени се седум кривични пријави против десет сторители, од кои седум во Тетовско и три во Гостиварско за сторени осум кривични дела (ТЕ-5 и ГВ-3) „напад на службено лице при вршење работи на безбедноста“ казниво по член 383 од Кривичниот законик, изјави Марјан Јосифоски, портпарол на СВР Тетово.
За напад на полицаец е предвидена парична казна или затвор до три години.Доколку дополнително сторителот се заканува со употреба на оружје, го малтретира или го навредува службеното лице, затворската казна е од шест месеци до пет години, а ако на полицаецот му се нанесе тешка телесна повреда, сторителот ќе се казни со затвор од една до десет години.
МВР уапси пет осомничлени по насилните протести што се случија во петокот 17 септември во тетовска Мала Речица.