Гордана Јанкулоска: За „Монструм“ прв ме извести Ивица Анчевски - Пуки

Добивај вести на Viber

Поранешната министерка за внатрешни работи Гордана Јанкулоска денеска како сведок во случајот „Монструм“ истакна дека веста за грозоморното убиство кај Смилковското езеро ја добила од тогашниот шеф на поранешната скопска единица за брзи интервенции „Алфа“ - Ивица Анчевски Пуки. Наведе дека за петкратното убиство, кое се уште го чека расплетот, дознала дента од Дежурниот оперативен центар и добила СМС порака со краток опис за пријавениот случај.

– Набрзо добив повик од Ивица Анчевски, тогашен шеф на „Алфите“ кој исто така ме извести за случајот. Побарав од него веднаш да замине на местото на настанот, а со тогашниот директор на Бирото за јавна безбедност Љупчо Тодоровски направивме голем напор сите што се на располагање веднаш да дојдат на работа. Го барав и тогашниот директор на УБК, Сашо Мијалков и началници на други служби. Формиравме оперативен штаб кој ги координираше активностите. Овој штаб работеше сѐ до поднесување на кривичната пријава против лицата – сведочеше Јанкулоска.

Јанкулоска додаде дека остварила низа контакти со косовскиот министер за полиција, но не биле обезбедени услови за екстрадиција и дека во тој период имало многубројни шпекулации и гласини.

Вицепремиерот Бујар Османи е следниот кој треба денеска да сведочи, а претходно тоа го направи поранешниот премиер Зоран Заев.