Гордана Силјановска Давкова: За македонската армија треба да се издвојува 2 отсто од БДП
Објавено во: Македонија 22 Април, 2019
Гордана Силјановска Давкова на еден од своите профили на Фејсбук објави дека ќе се залага за модернизацијата на македонската армија да се трошат два отсто од бруто-домашниот производ доколку биде избрана за претседател на Македонија на 5 мај. Оваа заложба се совпаѓа со доктрината на НАТО секоја земја-членка на Алијансата да издвојува по исто толкав процент од националниот БДП за вооружените сили.
„Драги мои, за остварување на мисијата и силна Армија потребен е зголемен и одржлив буџет од минимум 2% од БДП за модернизација, логистика и распоредливост на сили имајќи предвид и на потребите за повисок стандард и плати на воениот и цивилниот персонал. Како активна претседателка секоја година ќе се вклучам во буџетската дебата со цел да обезбедам повеќе финансии за модернизација на армијата.
Одржувањето на висок морал, дисциплина и чувството за патриотизам се основни елементи за изградба на воени лидери чија стручност и посветеност за решавање на проблеми се повеќе од потребни за предизвиците со кои се соочуваме сега и во иднина“, напиша Силјановска.
Додаде дека ќе се залага за обезбедување на сигурна иднина на припадниците на АРМ и дека ќе се посвети на одбраната на интернет (cyber defence); жени, мир и безбедност.
„Ќе се заложам да се изнајдат начини и да се заживее наменската индустрија по НАТО стандарди, но ќе се заложам и за формирање на фонд во рамките на АРМ со цел поттикнување на иновациите во одбраната на Републиката. Особено внимание ќе посветам на предизвикот за подигнување на безбедносната култура, јакнење на патриотизмот и чувството на припадност за одбрана на мултиетничка и мултирелигиска Македонија“, вели Силјановска во дел од напишаното.