Град Скопје ќе потроши 6,5 милиони евра за нов парк на местото на стариот Луна парк

Добивај вести на Viber

Преку фазна изградба во период од неколку години Град Скопје ќе потроши околу 6,5 милиони евра за нов забавен луна парк.

Според она што денеска го најави таткото на градот Коце Трајановски на постојаниот простор во Градскиот парк ќе се изгради нова инфраструктура, придружни објекти и ќе бидат поставени нов забавни реквизити. 

Надлежните велат дека паркот ќе ја зафаќа истата моментална површина на Луна паркот а зеленилото нема да се чепка.

Правдајќи се дека забавниот парк не е обвовен веќе 44 години, поточно од неговата изградба од 1973 година, Градоначалникот Трајановски посочи дека  е предвидена изградба на инфраструктура и објекти кои се неопходни за функционирањето на забавниот парк, како што се влезно излезна партија, објект за администрација, тоалети и други придружни објекти, партерно и хортикултурно уредување.

„Паралелно со изградбата на инфраструктурата, во оваа фаза ќе се постават седум реквизити и истите треба да пристигнат во рок од 6 месеци, за што се издвоени околу 130 милиони денари. Во првата фаза ќе се постават 1 адреналински, 2 полуадреналински, еден воз на шини и 3 детски реквизити“, рече градоначалникот Трајановски.

Според кажаното во паркот ќе има разни видови лулашки, вртелешки, тобогани и сличен вид на забавно-рекреативни содржини.