Град Скопје конечно ќе субвенционира инвертер клими против аерозагадувањето
Објавено во: Економија 07 Февруари, 2019
Огласот за субвенционирање на купени инвертер клима-уреди најдоцна до понеделник ќе биде објавен од страна на Град Скопје како мерка против аерозагадувањето.
Оваа мерка е долгонајавувана од страна на градоначалникот Петре Шилегов а сега за прв пат се спроведува како акција со популарните климатизери кои ефикасно загреваат зиме а не се големи потрошувачи на електрична енергија. Со оваа мерка градската управа се надева дека ќе ја намали употребата на тврд огрев кој е најголем загадувач од страна на домаќинствата.
-За секој купен инвертер клима уред, секој заинтересиран граѓанин кој ќе ги исполни условите за субвенционирање ќе има можност да добие половина од вкупната вредност на уредот, но не повеќе од 15.000 денари, рече на денешната прес-конференција скопскиот градоначалник Петре Шилегов.
Станува збор за ограничени средства од 20 милиони денари, па така пресметано е дека услужени ќе бидат само првите 1.300 домаќинства кои ќе аплицираат.
Интересот за овие уреди кај граѓаните е се поголем и без субвенционирање.