ГРАДЕЖНАТА ФЕЛА СЕ СЕЛИ ВО ТЕТОВО И ГОСТИВАР – незапирливо расте бројот на одобренија за градба во Западна Македонија

Добивај вести на Viber

Продолжува тенденцијата на раст на одобренијата за градба издадени за објекти кои ќе се градат во Западна Македонија. Иако, главниот град и понатаму е омилен за градежната фела, намалувањето на слободните парцели, но и растот на трошоците за градба се повеќе ги насочуваат градежните сили кон останатите градови во Македонија.

Бројките говорат дека и во октомври годинава се издадени најмногу одобренија за градба за Полошкиот регион. Имено, таму треба да никнат 113 нови објекти, додека следен на листата е Југоисточниот регион за каде се издадени 63 одобренија. По нив следува Пелагонискиот регион со вкупно 56 одобренија, а тек потоа Скопскиот со 51 одобрение. Податоците на Државниот завод за статистика покажуваат дека од вкупно 363 одобренија во целата земја, во Југозападниот регион се издадени 36 одобренија, додека пак во Источниот 24, а во Вардарскиот 12 одобренија за градба. Најмалку одобренија се издадени во Североисточниот регион каде се планираат да се изградат само 8 нови објекти.

-  Во октомври 2024 година се издадени 363 одобренија за градење, што е за 11,7 проценти повеќе во однос на истиот месец од претходната година. Според издадените одобренија за градење, предвидената вредност на објектите изнесува 8.469.616 илјади денари, што е за 12,3 проценти повеќе во однос на истиот месец од претходната година– укажуваат статистичарите.

Бројките откриваат дека најголем број нови објекти ќе се градат во Тетово со 29 планирани градби, па следува Гостивар со 21 градба. По нив се Теарце и Врапчиште со 19 издадени одобренија за градба, па Боговиње со 16 одобренија.

Меѓу останатите градови каде исто така ќе се гради со забрзано темпо е и Струмица, каде се издадени 36 одобренија, па следува Прилеп со 34 одобренија за градба. И во Кичево, кое потпаѓа по Југозападниот регион ќе има посилна градежна активност, и таму се планираат да се градат 21 нов објект.

Од друга страна во скопскиот регион, најмногу ќе се гради во Центар, за каде се планираат 10 нови објекти, па следува општина Илинден со 9 нови објекти.

Ова не е нова тенденција, напротив, изминатава година честопати се покажува дека има повеќе издадени одобренија за градба во внатрешноста отколку во главниот град. Разликата меѓу Скопје и останатите населени места е што во помалите градови и општини повеќе се градат индивидуални објекти, куќи, додека во главниот град најчесто никнуваат нови згради и станови.

Во извештајниот период е предвидена изградба на 913 станови, со вкупна корисна површина од 81.247 метри квадратни. Притоа најголем број нови станови повторно ќе никнат во скопскиот регион каде ќе се градат 471 стан, додека следен на листата е Југозападниот регион каде ќе се градат 146 нови станови, па Пелагонискиот со 116 станови. По нив доаѓа Полошкиот регион со вкупно 61 стан.

Растот на одобренијата за градба во останатите градови низ Македонија покажува дека има нови трендови и нов интерес за градење во региони кои досега не беа толку атрактивни.

Дека има промени во интересот на граѓаните потврдуваат и градежниците и посочуваат дека ваквите измени се позитивни, и време е да се создадат исти услови и за другите градови во земјава.

-  Растот на бројот на одобренија за градење во Тетово – Гостивар е позитивен тренд од причина што крајно време беше да се обезбедат услови и ресурси за градба и во другите градови на Македонија освен во Скопје. Со ова ќе се намали притисокот во главниот град, нема да се трошат сите ресурси во Скопје – вели искусен градежник за Фактор.

Според него, градењето нови објекти во Тетово, Гостивар, Прилеп, Битола, Струмица, Штип, Куманово и други градови во државата е многу добро од причина што така се придонесува за рамномерен регионален развој на сите региони во Македонија. Истовремено, со ширењето на градежните активности низ останатите градови од земјава се креираат работни места за жителите, и се намалува притисокот врз главниот град.

Нашиот соговорник потенцира дека е многу значајно да се води сметка и добра контрола врз изработените ДУП-ови од причина што урбанистите многу се наклонети кон инвеститорите и сопствениците на земјиштето и не ги почитуваат правилниците за просторно и урбанистичко планирање и Законот за градба.