„Градиме кариери, не стереотипи“ - приватниот сектор полека го прифаќа потенцијалот на жените Ромки

Добивај вести на Viber

Инклузијата и еднаквоста се повеќе од само идеали - тие се клучни концепти за просперитетна, модерна работна сила. Преку прифаќање на различностите, бизнисите не само што придонесуваат за социјалниот напредок, туку и отвораат нови можности за раст. Преку својата кампања во рамки на проектот „Вработена Ромка = Независна Ромка“, ХЕРА – Асоцијација за здравствена едукација и истражување ги урива бариерите помагајќи им на жените Ромки да пристапат до формално вработување, со што се преобликува нивната иднина и се градат поинклузивни заедници.

Од 2019 година, ХЕРА поддржана од шведската фондација  Kvinna Till Kvinna,преку овој проект неуморно работи на зајакнување на жените Ромки со овозможување пристап до информации, обуки и директна поддршка за искористување на активните мерки на Агенцијата за вработување на Република Северна Македонија (АВРСМ). Преку справување со предизвиците како што се нецелосно образование, социјална маргинализација и недостаток на информации, проектот им нуди на Ромките алатки кои им се потребни за самоуверено да влезат во формален работен однос.

Приватниот сектор стана клучен играч во оваа трансформација. Со отворањето на вратите за жените Ромки, компаниите од различни индустрии покажуваат дека кога создаваме еднакви можности, сите имаат корист.

За многу жени Ромки, формалното вработување останува неостварлива цел поради општествените предрасуди, ниското ниво на образование и ограничениот пристап до информации. Оваа кампања се обидува да го промени тој наратив, давајќи им на овие жени шанса не само да влезат во формалната работна сила, туку и да напредуваат во неа. Од обезбедување програми за едукација и квалификација, до практично советување и поддршка, проектот „Вработена Ромка = Независна Ромка“ им помага на жените да го остварат својот потенцијал и да изградат подобра иднина за себе и за своите семејства. Настрана од економското зајакнување, овие жени добиваат самодоверба, независност и способност да ги предизвикаат стереотипите кои долго време ги спречуваат.

Приватниот сектор сè повеќе ја сфаќа вредноста на различноста и инклузивноста, а компаниите почнуваат да им даваат можности на Ромките.

„Во нашата компанија има вработени 20 жени Ромки. Меѓу нив има жени коишто работат веќе 2 години кај нас, но има и жени со над 10 години работен стаж поминат во нашата компанија. Поконкретно, најдолгиот работен однос заснован кај нас за жена Ромка е 13 години. Сите овие 20 жени Ромки кои се значаен дел од нашиот тим, покажале интерес за работа, одговараат на зададените работни задачи и точно и навреме ги завршуваат работните обврски. Токму затоа, комплетно се вклучени во целиот процес на производство“ – вели Марија Димитрова, менаџер за човечки ресурси во компанијата Макпрогрес ДОО.

Камелија Џабирски, координатор во здружението Асоцијација на Социјални Провајдери ,,Стартер Плус”, кое се занимава со обука и вработување на лица за обезбедување на услуги за грижа во заедницата, вели дека во моментов имаат вработено 2 жени Ромки коишто се вреден дел од тимот.

„Имаме вработено две жени Ромки кои работат како палијативни негуватели со цело работно време. Тие се во работен однос од март оваа година и од досегашното искуство можам да кажам дека тие сосема коректно ги извршуваат своите работни задачи, покажуваат интерес за работа, навремено ги посетуваат крајните корисници, присутни се на секој состанок и имаме одлична комуникација. Со редовната евалуација што се врши со крајните корисници, имаме увид дека и тие се задоволни од услугата која им се дава“ – објаснува Џабирски.

„Фирмата Прима Виста ДООЕЛ има вработено во моментот 3 жени Ромки кои работат на различни позиции како квалификувани шивачки, пеглачки и рачни работнички. Две од вработените се над 10 години во нашето претпријатие, а третата вработена е веќе 4 години во нашето претпријатие. Ова е потврда дека вработените добро си ги извршуваат своите работни задачи и се доволно квалификувани за да бидат формално вработени.”- објаснува управителот Стојанчо Лазаров од фирмата Прима Виста.

„Овој проект е повеќе од само вработување, се работи за промена на перцепциите. Вклучувањето на жените Ромки во работната сила покажува дека нивните придонеси се исто толку вредни како и сите други. Обезбедувајќи им ги алатките и поддршката потребни за да успеат, не само што им помагаме да излезат од циклусот на сиромаштија и маргинализација, туку и ја збогатуваме пошироката работна сила со различни таленти и перспективи“ - велат од ХЕРА.