Градоначалник на Гдањск почина откако беше избоден на добротворен концерт
Објавено во: Свет 14 Јануари, 2019
Павел Адамович, 53 годишниот градоначалник на полскиот град Гдањск почина, откако синоќа беше избоден на добротворен концерт.
Популарниот политичар еден од најистакнатите експоненти на опозицијата и силен противник на конзервативната и суверенистичка влада на Јарослав Качински, веднаш по нападот е пренесен во болница во критичка состојба. Тој итно е опериран во интервенција која траела 5 часа. Сепак, градоначалникот им подлегна на повредите.
Напаѓачот, 27 годишен Стефан В. од Гдањск има криминално досие и минатиот месец излегол од затвор. По нападот синоќа тој пред публиката кажа дека поранешната политичка партија на Адамович е виновна што тој бил во затвор во 2014 година за серија насилни напади.
На бината повеќе пати го избол градоначалникот извикувајќи „Адамович е мртов“.
Адамович веќе долго време беше цел на омраза во екстремно десничарските кругови поради неговата енергична одбрана на правата на мигрантите и бегалците.
Тој беше на чело на Гдањск од 1998 година, а лани беше избран со 65 % од гласовите.
Многумина во Полска сметаат дека нападот е резултат на порастот на говорот на омраза. Сопругата на Адамович била во Велика Британија за време на нападот. Полската влада испрати авион во Лондон за да ја врати во Полска.