Градоначалникот на Прилеп тврди дека не се заразил од медицинска сестра во неговата ординација
Објавено во: Македонија 02 Април, 2020
Градоначалникот на Прилеп, Илија Јованоски, демантира дека се заразил од корона вирусот од заболена медицинска сестра од неговата ординација „Ортомедика“. Тој вели дека медицинскиот персонал сега е во самоизолација по препорака на надлежните служби.
„Како прв човек на градот, чувствувам потреба и обврска да ви се обратам вам, граѓаните на општина Прилеп, по однос на дезинформациите кои вчера и денеска кружат на социјалните мрежи, за мој наводен контакт со било кој од вработените во ПЗУ „Ортомедика“, во последните петнаесетина дена, каде за жал на еден член на медицинскиот персонал му е констатиран позитивен наод од коронавирусот.
Со најголема индигнација, ги отфрлам ваквите дезинформации.
Веднаш после потврдувањето на случајот, согласно препораките на надлежните служби, амбулантата е привремено затворена, а останатите членови од медицинскиот персонал се наоѓаат во самоизолација“, објави Јованоски.
Тој додава дека е свесен за одговорноста која треба да се сносува во оваа ситуација, од која како што вели тој, произлегуваат дезинформации и лажни вести.
„Во услови кога борбата со коронавирусот е наш врвен приоритет, тенденциозното ширење на дезинформации и лажни вести, е чин на највисока неодговорност и е во правец на создавање паника и страв кај граѓаните.
Во врска со ситуацијата со коронавирусот во нашата општина, апелирам граѓаните да се информираат исклучиво од претставниците на официјалните институции“, додава Јованоски.