Граѓаните потпишуваат онлајн петиција за укинување на покачувањето на струјата
Објавено во: Економија 02 Август, 2020
Има онлајн петиција за укинување на покачувањето на струјата и намалување на ДДВ на 5 отсто.
Иницијативата „Млади за Македонија“ започна онлајн петиција со име „Граѓанска иницијатива за укинување на покачувањето на струјата и намалување на ДДВ на 5 отсто“.
Во петицијата стои дека граѓаните се револтирани на покачувањето од 7,4 отсто за електричната енергија и вознемирени од последиците врз цените на производите и услугите во Македонија.
„Бесни поради континуираното осиромашување на народот и државата од страна на странските монополи, загрижени за нашите сограѓани кои поради актуелната пандемија нема да можат да ги покријат своите сметки за електрична енергија и поскапите намирници, имајќи ги во предвид платите во Република Македонија, кои се едни од најниските во Европа, со надеж дека ќе го подобриме животниот стандард на народот, ја покренуваме оваа електронска Граѓанска иницијатива“, стои во онлајн петицијата.
Како прво барање е итно укинување на одлуката на Регулаторната комисија од 31 јули за покачувањето на струјата за 7,4 отсто. Второ, намалување на данокот на додадена вредност за електричната енергија за домаќинствата од сегашните 18 отсто на 5 отсто.
Барањата се до Регулаторна, Собранието, Министерството за економија, Владата и Претседателот.
Завчера е донесена одлука за покачување на струјата, по што имаше бројни реакции.