Гранит го билда економскиот раст за 2019 година
Објавено во: Економија 22 Март, 2019
Најголемата домашна градежна компанија влегува во сериозен циклус на градежни активности. Компанијата Гранит објави дека во конзорциум со Интеграл Инженеринг ќе го гради автопатот од Коридорот 5Ц низ Република Српска, вреден дури 62,5 милиони евра. Договорот со Јавното претпријатие Автопати на Република Српска е потпишан завчера во Бања Лука. Инаку овој автопат поминува од правец помеѓу клучката Јоховац (Товир) и Руданка (Костајница).
Со овој договор градежната компанија Гранит добива сериозно забрзување во работата. Најтешката година во последниот период за македонските градежници, фирмата ја помина со намалени приходи, но со добивка од близу пет милиони евра. Според податоците за раст на македонската економија, градежништвото во последниот квартал лани има солиден раст по стагнацијата во претходните три квартали.
Аналитичарите велат дека ова е сигнал дека работите се менуваат, а дека и Гранит и другите градежни компании може да ги очекува добар период
„Градежните компании лани имаа тешка година, а Гранит според објавените финансиски резултати сепак помина многу добро. Последните податоци за растот на градежништвото, но и договрите за добиени вредни градежни активности сигурно ќе с ерефлектира дополнително добро врз работата на компанијата и финансиските резултати, може да се очекува да бидат уште подобри, вели Коста Костадиновски, директор на Илирика.
Според него дополнително градежниот сектор ќе добие „на сила“ со членството на Македонија во НАТО, затоа што нашите компании ќе станат квалификувани изведувачи на сите НАТО тендери. Според политиката на алијансата секаде каде има потреба се користат градежни компании кои се од земји членки. Костадиновски вели дека тоа ќе биде дополнителен поттик и ќе ја зголеми ширината на потенцијалниот пазар, осебено за Гранит кој има меѓународни референци.
А.Т.